عوام کی آواز بہری حکوت کو سنانے اور ان کی تکلیفوں کو منظر عام پر لانے کے لئے ہم ’بھارت جوڑو یاترا‘ کر رہے ہیں: راہل گاندھی

تھرشور: بھارت جوڑو یاترا اس وقت کیرالہ میں ہے اور راہل گاندھی سمیت تمام پیدل یاتری ہندوستان کو متحد کرنے اور عوام کی تکلیفوں کو منظر عام پر لانے کی پوری کوشش کر رہے ہیں۔ اسی ضمن میں راہل گاندھی نے فیس بک پر ایک تصویر شیئر کرتے ہوئے مودی حکومت کو ہدف تنقید بنایا ہے۔ اس تصویر میں ایل پی جی سلنڈر کے داموں کو ظاہر کر کے مہنگائی کا درد بیان کیا گیا ہے۔ راہل گاندھی نے تصویر شیئر کرتے ہوئے کہا کہ یہ تکلف صرف کیرالہ ہی میں نہیں بلکہ ہندوستان بھر کے عوام کی تکلیف ہے اور حکومت اس پر توجہ نہیں دے رہی۔

راہل گاندھی نے فیس بک وال پر لکھا ’’تصویریں بولتی ہیں۔ یہ تصویر صرف کیرالہ کی نہیں بلکہ پورے ملک کی تکلیف بیان کر رہی ہے وزیر اعظم بننے سے پہلے مودی جی نے مہنگائی پر بڑے بڑے بھاسن دیئے، جملے اچھالے، خواتین کو چولہے پر کھانا بناتے دیکھ، انہیں درد ہوتا ہے، یہ بتا کہ جذباتی بھی ہوئے لیکن آج حقیقت کیا ہے؟‘‘

انہوں نے مزید لکھا کہ ’’گزشتہ 8 سالوں میں 410 روپے کے سلنڈر کو 1100 اور کسی کسی ریاست میں تو اس سے بھی زیادہ قیمت کا کر دیا گیا۔ مہنگائی عام عوام کے سینے پر تانڈو کر رہی ہے۔ لوگوں کو دو وقت کا بھرپیٹ کھانا تک نہیں مل رہا۔ غریب کی تو بات ہی چھوڑ دیجئے، کیونکہ ویسے بھی راجہ کو اپنے امیر ’دوستوں‘ کے آگے غریب عوام نظر ہی نہیں آتے۔‘‘

راہل گاندھی نے کہا کہ ’’جب سے ہماری بھارت جوڑو یاترا شروع ہوئی ہے، تب سے بی جے پی کے لوگ روز پوچھتے ہیں کہ کانگریس پارٹی بھارت جوڑو یاترا کیوں کر رہی ہے، اس کی کیا ضرورت ہے؟ میں بتاتا ہوں۔ یہ جو لوگ تصویروں میں اپنی تکلیف بیان کرتے نظر آ رہے ہیں، انہیں بی جے پی کے ’مہنگے دنوں‘ نے توڑ کر رکھ دیا ہے۔ یہ عام عوام ہیں۔‘‘

انہوں نے آخر میں کہا کہ ’’یہ دن رات محنت کرتے ہیں، اپنا خون پسینہ ایک کر کے مشکل سے اپنا خاندان چلاتے ہیں۔ آج بی جے پی حکومت، ان کے پاس جو کچھ بھی ہے، وہ چھیننے پر آمادہ ہے۔ چاہے وہ روزگار ہو یا ان کا سرمایہ۔ اپنے ملک کے اسی عوام کی جدوجہد کی لڑائی لڑنے، ان کی آوازیں اس بہری حکوت کو سنانے کے لئے ہم بھارت جوڑو یاترا کر رہے ہیں۔ جتنی بڑی تعداد میں لوگ ہماری اس یاترا کا حصہ بن رہے ہیں، یہ اتحاد اس مغرور اور متکبر حکومت کے تخت کو ہلا کر رکھ دے گا۔ مہنگائی سے ناطہ توڑو، بھارت جوڑو۔‘‘