دیکھیں ویڈیو: آمروں کو لطیفوں سے نفرت کیوں ہے؟ کنال کامرا اور یوگیندر یادو کی گفتگو

یوگیندر یادو نے مذاق کرتے ہوئے کہا کہ ٹی وی اینکر ان سے یہ ضرور پوچھیں گے کہ وہ یاترا میں کیا کر رہے ہیں اور آیا وہ سیاست میں اترنے یا کانگریس میں شامل ہونے کا منصوبہ بنا رہے ہیں؟ یہ بھی کہہ سکتے ہیں کہ کیا اس کی وجہ یہ ہے کہ کنال کامرا کے پاس کوئی کام نہیں ہے اور فی الحال بے روزگار ہے؟

اس کے جواب میں اسٹینڈ اپ کامیڈین نے اعتراف کیا کہ ان کے لیے ہندوستان میں پرفارم کرنا مشکل ہو گیا ہے حالانکہ وہ ریاستہائے متحدہ کی ہر دوسری ریاست میں پرفارم کر سکتے ہیں۔ ان کا کہنا تھا کہ بیرون ملک کام کی کوئی کمی نہیں ہے لیکن دہلی، نوئیڈا اور گروگرام میں پولیس کی طرف سے درخواست مسترد کر دی جاتی ہے۔ وہ اب بھی مہاراشٹرا میں پرفارم کر سکتے ہیں، جہاں کی اخلاقیات علیحدہ ہیں اور ہر نظریے کا خیر مقدم کیا جاتا ہے۔ کیرالہ کی تو بات ہی مت کیجئے کیونکہ وہاں لوگ آپ کی بات سننے کے لیے نہیں بلکہ آپ کو اپنی بات سنانے کے لیے آتے ہیں! کامرا نے مذاق کے لہجہ میں کہا کہ اگر کہیں مائیکروفون موجود ہے تو کامریڈ تو ضرور بولے گا!

کامرا نے مزید سنجیدہ ہوتے ہوئے کہا کہ وہ 8 دسمبر سے ایک ہفتہ تک ’بھارت جوڑو یاترا‘ کا مشاہدہ کر رہے تھے، یہ سمجھنے کی کوشش کر رہے تھے کہ اتنی بڑی تعداد میں لوگ اس یاترا میں کیوں شامل ہو رہے ہیں۔ ایک ہفتے سے زیادہ لوگوں کی باتیں سننے کے بعد وہ راہل گاندھی کے ساتھ چلنے پر راضی ہوئے۔ انہوں نے مزید کہا ’’میں نے محسوس کیا کہ خوف سے باہر آئے بغیر کام نہیں چلے گا اور غیر جانبداری کی آڑ لینا مناسب نہیں۔‘‘

کامرا نے یادو کو یاد دلایا کہ وہ راہل گاندھی اور کانگریس پر بھی لطیفے سنا چکے ہیں۔ دراصل، بی جے پی نے کانگریس اور راہل گاندھی کا تمسخر اڑانے کے لئے لطیفوں کا زبردست استعمال کیا تھا لیکن اسی بی جے پی کے پاس وہ قوت نہیں ہے کہ وہ اپنے اوپر کہے جانے والے لطیفوں کو برداشت کر سکے۔

اسٹینڈ اپ کامیڈین، کارٹونسٹ اور طنز نگار حکومت اور پولیس کی گرفت میں کیوں ہیں؟ اس پر کامرا نے کہا کہ بھارتیہ جنتا پارٹی نے کامیڈی کو کانگریس اور راہل گاندھی کے خلاف ہتھیار کے طور پر استعمال کیا۔ لیکن آج کی کوئی بھی کامیڈی موجودہ نظام پر ہی کہی جانی چاہئے اور موجودہ نظام کتنا روادار ہے یہ کسی سے پوشیدہ نہیں ہے۔

یوگیندر یادو نے اتفاق کیا اور کہا کہ انہیں اکثر ایسے لوگوں کا سامنا کرنا پڑتا ہے جو ان پر ’غلط طرف‘ ہونے کا الزام لگاتے ہیں اور جو ان سے متفق نہیں ہیں، لیکن وہ ان کے خیالات کو خوش اسلوبی سے قبول کرتے ہیں لیکن کچھ لوگ مذاق اور مزاح پر زیادہ پرتشدد ردعمل ظاہر کرتے ہیں۔

یادو نے کہا کہ ہر جگہ کے آمر کامیڈی سے ڈرتے ہیں۔ انہوں نے کہا ’’وہ معقول دلائل، منطق، حقائق اور اعداد و شمار سے نہیں ڈرتے۔ انہیں فرضی اور ہیرا پھیری والے اعداد و شمار، نوٹ بندی کے اثرات کے بارے میں بتائیں تو وہ کچھ نہیں کریں گے لیکن آمر پر اگر لطیفہ کہہ دیا تو وہ غصہ سے لال ہو جاتے ہیں۔ انہوں نے کہا ’’ اور خاص طور پر جب آمر ایک جوکر ہو۔‘‘

کامرا کا کہنا تھا کہ نہیں، کنال کامرا سیاست یا کانگریس میں شامل نہیں ہو رہے ہیں۔ وہ لطیفے سنا کر خوش ہیں۔ اس کام کو وہ سب سے بہتر جانتے ہیں۔ وہ سیاست سے منقطع نہیں ہیں لیکن سیاست میں شامل ہونے سے ان کی معروضیت متاثر ہوگی۔ تاہم انہوں نے یہ بھی اعلان کیا کہ ’بھارت جوڑو یاترا‘ میں شامل نہ ہونے کی کوئی وجہ نہیں ہے۔