توہین رسالتؐ کے مرتکب ٹی راجا کی رہائی کے خلاف حیدرآباد میں شدید احتجاج

حیدرآباد: توہین رسالتؐ کے الزام میں گرفتار بی جے پی کے رکن اسمبلی ٹی راجا سنگھ کو گرفتار کئے جانے کے بعد عدالت میں پیش کیا گیا۔ جہاں ان کی درخواست ضمانت منظور کر لی گئی اور ان کی رہائی کا حکم صادر کر دیا گیا۔ ٹی راجا کی رہائی کی اطلاع موصول ہوتے ہیں جہاں ان کے حامیوں نے خوشی منائی وہیں مسلمانوں میں غم و غصہ کی لہر میں اضافہ ہو گیا۔

خیال رہے کہ بی جے پی ایم ایل اے نے پیر کے روز اسٹینڈ اپ کامیڈین منور فاروقی پر تنقید کرتے ہوئے ایک ویڈیو جاری کی تھی، جنہوں نے حال ہی میں شہر میں پرفارم کیا تھا، اس کے ساتھ ہی ٹی راجا نے اسلام پر بھی تبصرہ کیا۔ راجا سنگھ نے منور فاروقی پر ہندوؤں کے مذہبی جذبات کو ٹھیس پہنچانے کا الزام عائد کرتے ہوئے انہیں گالیاں دیں اور پیغمبر اسلامؐ کے بارے میں بھی توہین آمیز کلمات کہے۔

راجا سنگھ کے رہا ہو کر لوٹتے ہی ان کے گھر کے باہر حامیوں کی بھیڑ جمع ہو گئی۔ وہیں ان کے بیان سے مشتعل لوگوں نے سڑک پر اتر کر مظاہرہ کیا۔ حیدرآباد کی سڑکوں پر اترے سینکڑوں افراد نے ٹی راجا کو پھانسی دئے جانے کا مطالبہ کیا۔ رپورٹ کے مطابق چار مینار پر مظاہرے کے دوران لوگ اتنے مشتعل ہو گئے کہ پولیس کی گاڑیاں بھی نذر آتش کر دیں۔

خیال رہے کہ ٹی راجا کو بی جے پی نے پارٹی سے معطل کر دیا ہے اور ان کے خلاف وجہ بتاؤ نوٹس بھی جاری کیا گیا ہے۔ ٹی راجا سے قبل بی جے پی لیڈران نوپور شرما اور نوین جندل نے بھی پیغمبر اسلامؐ پر نازیبا تبصرے کئے تھے، جس پر ملک اور مسلم دنیا سے سخت رد عمل کا اظہار کئے جانے کے بعد بی جے پی نے دونوں پر کارروائی کی تھی۔