اتر پردیش: راپتی ندی نے توڑ دیا سیلاب کا ریکارڈ، 2 لاکھ افراد مشکل میں، راحت و بچاؤ کا عمل شروع، این ڈی آر ایف طلب

اتر پردیش میں گزشتہ ایک ماہ سے ہو رہی موسلادھار بارش کی وجہ سے بدحالی کا عالم دیکھنے کو ملا۔ مکانات منہدم ہونے اور آسمانی بجلی کی وجہ سے بڑی تعداد میں اموات ہوئیں، اور یہ سلسلہ تھمنے کا نام نہیں لے رہا ہے۔ اب خبریں سامنے آ رہی ہیں کہ بلرامپور ضلع میں راپتی ندی نے 2017 کے سیلاب کا ریکارڈ توڑ دیا ہے۔

میڈیا رپورٹس کے مطابق ندی کی آبی سطح خطرے کے نشان سے 96 سنٹی میٹر اوپر پہنچ گئی ہے۔ ضلع کے تقریباً 355 گاؤں اور یہاں کی قریب 2 لاکھ آبادی سیلاب کی زد میں آ گئی ہے۔ بلرامپور نگر کے کچھ محلوں میں کشتیاں چل رہی ہیں۔ انتظامیہ راحت و بچاؤ کا عمل شروع کر چکا ہے، لیکن حالات انتہائی تشویشناک ہیں۔ قومی شاہراہ سمیت کئی سڑکوں پر سیلاب کا پانی بہنے سے آمد و رفت بری طرح متاثر ہے۔

بتایا جاتا ہے کہ سیلاب میں تقریباً 70 ہزار ہیکٹیر دھان اور گنے کی فصل غرقاب ہو گئی ہے۔ ضلع کے 405 اسکولوں میں سیلاب کا پانی بھر گیا ہے۔ انتظامیہ نے این ڈی آر ایف کی ٹیم بلا لی ہے، لیکن اندیشہ ظاہر کیا جا رہا ہے کہ شام تک حالات مزید خراب ہو سکتے ہیں۔ ایس ڈی آر ایف کی ٹیمیں راحت و بچاؤ کام میں پہلے سے ہی مصروف ہیں، اور جب شام تک این ڈی آر ایف کی ٹیم آ جائے گی تو کام میں تیزی آئے گی۔

شراوستی ضلع کا بھی حال بہت برا ہے۔ ضلع کے تقریباً 900 اسکول سیلاب کے پانی سے بھرے ہوئے ہیں۔ مقامی لوگ محفوظ مقامات کی طرف بڑھ رہے ہیں اور انتظامیہ بھی اس میں مدد کر رہی ہے۔ کئی گاؤں میں تو ایسا لگ رہا ہے جیسے ندی اپنا راستہ بدل کر بہہ رہی ہے۔ مقامی لوگ اپنی جان بچانے کے لیے بڑی مشکل سے اونچے مقامات کی طرف بڑھ رہے ہیں۔