اتر پردیش: برفیلی ہواؤں سے روزمرہ کی زندگی متاثر، کہرے سے دھیمی ہوئی رفتار

لکھنؤ: پہاڑی علاقوں میں ہو رہی برفباری سے اترپردیش کے میدانی علاقوں میں جاری ’شیت لہر‘ سے روز مرہ کی زندگی مفلوج ہے، وہیں گھنے کہرے کا اثر ریل اور سڑک آمد ورفت پر پڑا ہے جس کی وجہ سے لمبی دوری کی کئی ٹرینیں اپنے وقت معینہ سے کئی گھنٹوں کی تأخیر سے چل رہی ہے۔

لکھنؤ، کانپور اور اناؤ سمیت ریاست کے کئی علاقوں میں اتوار کو کھلی دھوپ کے باوجود برفیلی ہواؤں کے تھپیڑوں نے لوگوں کو سر سے پاؤں تک گرم کپڑوں سے ڈھکے رہنے پر مجبور کردیا ہے۔ ہفتے کی چھٹی کی وجہ سے سڑکوں پر عام طور پر سنٹا چھایا رہا۔ بازار اور مال کی سیر کی بجائے لوگوں نے گھر کی چھتوں اور پارکوں میں دھوپ سینکنے کو ترجیح دی۔

مشرقی اور مغربی اترپردیش میں رات سے چھائے گھنے کہرے کی وجہ سے سڑکوں پر گاڑیاں رینگتی نظر آئیں جبکہ لکھنؤ سے گزرنے والی لمبی دوری کی 27 سے زیادہ ریل گاڑیاں اپنے وقت معینہ سے 23 گھنٹے تک کی تأخیر سے چل رہی ہیں۔ لکھنؤ سمیت ریاست کے کئی اضلاع میں موبائل انٹرنیٹ خدمات کے معطل ہونے کی وجہ سے مسافروں کو گھر بیٹھے ٹرین کا ’رننگ اسٹیٹس‘ جانے میں دقتوں کا سامنا کرنا پڑا اور وہ اسٹیشن پر کھڑے ہوکر ٹرین کا انتظار کرنے پر مجبور ہوئے۔

بڑھتی ٹھنڈ کی وجہ سے لکھنؤ اور پریاگ راج سمیت ریاست کے زیادہ تر اضلاع میں 12 ویں تک کے اسکولوں میں چھٹی کا اعلان کردیا گیا ہے جبکہ کئی اسکول انتظامیہ نے اسکول کے نظام الاوقات میں تبدیلی کی ہے۔

محکمہ موسمیات کے مطابق اگلے 48 گھنٹوں تک موسم میں خصوصی تبدیلی کے آثار نہیں ہیں۔ اس مدت میں ایک دومقامات پر بادل چھائے رہیں گے۔ کہرے سے نجات ملنے کی فی الحال کوئی آثار نہیں ہیں۔ اس دوران کچھ علاقوں میں سخت کہرہ پڑنے کے امکانات ہیں۔

گزشتہ 24 گھنٹوں میں ریاست کے کئی علاقوں میں زیادہ سے زیادہ درجہ حرارت معمول سے چھ ڈگری کم تک ریکارڈ کیا گیا جبکہ کم از کم درجہ حرارت میں معمولی اضافہ درج کیا گیا ہے۔ ہردوئی میں زیادہ سے زیادہ درجہ حرارت 16.8 ڈگری سلسیس رہا جو معمول سے چھ ڈگری کم ہے وہیں مرادآباد میں زیادہ سے زیادہ درجہ حرارت 17 ڈگری، سلطان پور میں 19۔8 ڈگری، لکھنؤ میں 20.3 ڈگری اور کانپور میں 19.4 ڈگری سلسیس ریکارڈ کیا گیا۔

سخت ٹھنڈ کی وجہ سے انتظامیہ نے جگہ جگہ الاؤ اور رین بسیروں کا انتظام کیا ہے اس کے باوجود لکھنؤ سمیت زیادہ تر علاقوں میں غریب اور بے سہارا کھلے آسمان کے نیچے رات گزارتے دکھائی دئیے۔ لکھنؤ چڑیا گھر میں جانوروں کو ٹھنڈ سے بچانے کے لئے ان کے باڑوں میں ہیٹر وغیرہ لگائے گئے ہیں۔ ٹھنڈ کی وجہ سے بندروں اور دیگر جانوروں کی خوراک بڑھا دی گئی ہے۔ پریاگ راج ضلع انتظامیہ نے سخت ٹھنڈی کی وجہ سے نرسری سے 12 ویں جماعت تک کے سبھی اسکول اور کالج پانچ جنوری تک بند رکھنے کا اعلان کیا ہے۔