یو پی: ضمنی انتخابات کے لئے کاؤنٹنگ کی تمام تیاریاں مکمل

لکھنؤ: اترپردیش کی 11 اسمبلی سیٹوں پر 21 اکتوبر کو ڈالے گئے ووٹنگ کی کاؤنٹنگ کے لئے تمام تیاریاں مکمل کرلی گئی ہیں۔ ان سیٹوں پر ووٹوں کی کاونٹنگ کا آغاز صبح آٹھ بجے سے ہوگا۔ دوپہر بعد تک نتائج کے آنے کے امکانات ہیں۔ الیکشن کمیشن کے ذرائع نے بدھ کو یہاں بتایا کہ ووٹ شماری کے لئے تمام تیاریاں مکمل کر لی گئی ہیں۔ پہلے پوسٹل بیلٹ کو شمار کیا جائے گا اور اس کے بعد ہر راؤنڈ میں 14 ای وی ایم مشینوں کو ایک ساتھ لیا جائےگا۔ ریاست کی گیارہ اسمبلی سیٹیں جن پر ضمنی انتخابات ہوئے ہیں ان میں گنگوہ (سہارنپور)، رامپور، اگلاس (علی گڑھ)، لکھنؤ کینٹ، گوند نگر (کانپور)، مانکپور (چترکوٹ)، زید پور (بارہ بنکی)، جلالپور (امبیڈکرنگر)، بلہا (بہرائچ) ،گھوسی (مئو) اور پرتاپ گڑھ شامل ہیں۔

ضمنی انتخابات میں اوسط ووٹنگ 47.05 فیصد درج کی گئی تھی۔ جوکہ 2017 کے اسمبلی انتخابات کے مقابلے میں 13 فیصدی کم ہے۔2017 کے اسمبلی انتخابات میں اوسط پولنگ 60 فیصدی ریکارڈ کی گئی تھی۔ان گیارہ سیٹوں پر سب سے زیادہ پولنگ گنگوہ سیٹ پر60.30 فیصدی جبکہ سب سے کم لکھنؤ کینٹ پر 28.53 فیصدی درج کی گئی تھی۔ اس کے علاوہ جلال پور میں 58.80 فیصد، زید پور میں 58 فیصدی ووٹنگ ہوئی تھی۔

گیارہ سیٹوں میں سے 9 سیٹیں بی جے پی اور اس کی اتحادی اپنا دل(ایس) کے پاس تھیں۔ جبکہ سماج وادی پارٹی اور بہوجن سماج پارٹی کے پاس بھی ایک ایک سیٹیں تھی۔ ان انتخابات میں چہار رخی مقابلہ دیکھنے کو ملا اور تمام بڑی پارٹیاں بی جے پی، ایس پی، بی ایس پی اور کانگریس نے سبھی سیٹوں پر اپنے امیدوار میدان میں اتارے تھے۔

وزیر اعلی یوگی آدتیہ ناتھ نے جہاں سبھی سیٹوں پر انتخابی مہم چلائی تو وہیں سماج وادی پارٹی سربراہ اکھلیش یادو نے انتخابی مہم کے آخری دن رامپور میں اپنے پارٹی امیدوار کے حق میں تشہیر کی جبکہ کانگریس جنرل سکریٹری پرینکا گاندھی اور بی ایس پی سپریمو مایاوتی نے انتخابی مہم سے اپنے آپ کو دور رکھا۔

قابل ذکر ہے کہ کل ان سیٹوں کے نتائج سیاسی پارٹیوں کے لئے راستے کھولیں گے کہ وہ 2022 کے اسمبلی انتخابات کی تیاریوں کی حکمت عملی کن نکات پر اور کس سمت میں طے کریں۔