یوپی انتخابات: معروف شاعر منور رانا کا نام ووٹر لسٹ سے غائب، چھلکا درد

لکھنؤ: اتر پردیش میں انتخابات کے چوتھے مرحلہ کی پولنگ جاری ہے اور کئی لوگوں کے نام ووٹر لسٹ سے غائب ہونے کی شکایتیں موصول ہو رہی ہیں۔ معروف شاعر منور رانا کا نام بھی ووٹر لسٹ سے غائب ہے۔ منور رانا نے ووٹر لسٹ میں نام نہ ہونے پر برہمی کا اظہار کرتے ہوئے کہا کہ جب حکومت ہی ووٹ ڈالنے کا موقع نہیں دے رہی تو دکھ کس بات کا؟

منور رانا نے میڈیا سے بات کرتے ہوئے کہا کہ ’’میری خوش قسمتی تھی کہ جس جگہ میں رہتا ہوں، پولنگ بوتھ اس سے قریب ہے، میرے لیے ووٹ ڈالنا آسان تھا لیکن جب میں نے کل یہاں کے ممبر سے پرچی مانگی تو معلوم ہوا کہ میرا ووٹ ہی نہیں ہے، صرف میری بیوی کا ووٹ ہے، پرچی انہیں ملی تھی، ظاہر سی بات ہے کہ اس بارے میں کیا کہا جا سکتا ہے!‘‘

منور رانا نے کہا ’’گزشتہ بار میرا ووٹ تھا، میں یہ الزام نہیں لگاؤں گا کہ میرا ووٹ جان بوجھ کر کاٹا گیا ہے لیکن میرا ووٹ نہ ہونے سے اندازہ لگایا جا سکتا ہے کہ یہ بہتر حکمرانی نہیں ہے، بدانتظامی کی وجہ سے ہماری پرچی نہیں آئی اور ہم ووٹ نہیں ڈال سکے۔‘‘

الیکشن کے معاملے پر بات کرتے ہوئے منور رانا نے کہا کہ ’’جن ایشوز پر الیکشن ہونا چاہیے تھا ان پر الیکشن نہیں ہو رہا ہے۔ خاص طور پر بی جے پی ان مسائل پر جنگ نہیں لڑ رہی ہے، جن پر انہیں جواب دینا پڑے گا۔ وہ ان مسائل پر انتخابات لڑ رہی ہے، جن پر وہ جواب مانگتی ہے۔‘‘

انہوں نے مزید کہا، ’’دھرم کے نام پر لڑائی کریں، مذہب کے نام پر لڑائی، بی جے پی الیکشن نہیں لڑ رہی بلکہ غنڈہ گر دی کر رہی ہے۔ گزشتہ 70 سالوں میں پارٹی کی بنیاد پر الیکشن نہیں ہوتا تھا، پہلے الیکشن آدمی کی بنیاد پر ہوتا تھا لیکن اب الیکشن پارٹی پر مرکوز ہوتا ہے، لوگ سوچتے ہیں کہ ہم کس پارٹی کو ووٹ دیں۔‘‘ ووٹ نہ ڈالنے کے سوال پر شاعر منور رانا نے کہا کہ مجھے کوئی دکھ نہیں، جب حکومت ہی ووٹ ڈالنے کا موقع نہیں دے رہی تو پھر دکھ کس بات کا ہوگا۔