وزیر داخلہ امت شاہ کو استعفیٰ دینا چاہئے: دیوندر یادو

دہلی پردیش کانگریس کے صدر دیوندر یادو نے دہلی کار بم دھماکہ کے سلسلے میں سکیورٹی کی صورتحال پر سوال اٹھاتے ہوئے وزیر داخلہ امت شاہ سے استعفیٰ کا مطالبہ کیا ہے۔ دیوندر یادو نے بدھ کے روز کہا کہ بی جے پی کی قیادت والی مرکزی حکومت ابھی تک اس دھماکہ کے تعلق سے کسی نتیجے پر نہیں پہنچی ہے۔ اس سے ملک کی سلامتی اور عوام کی حفاظت پر سنگین سوالات اٹھتے ہیں۔

انہوں نے کہا کہ ممبئی دہشت گردانہ حملے کے بعد اس وقت کے وزیر داخلہ شیوراج پاٹل نے سکیورٹی کی خامیوں کی ذمہ داری لیتے ہوئے استعفیٰ دے دیا تھا۔ اسی طرح وزیر داخلہ امت شاہ کو دہلی کار بم دھماکے کی ذمہ داری لیتے ہوئے فوری طور پر مستعفی ہو جانا چاہیے۔

انہوں نے کہا کہ دھماکے سے پہلے دہلی دھماکہ خیز مواد سے بھری کار 11 گھنٹے تک دارالحکومت میں گھومتی رہی ہے۔ دارالحکومت میں دھماکہ خیز مواد کے ساتھ آزادانہ گھومنے والی کار کے لیے حکومت براہ راست ذمہ دار ہے، کیونکہ دہلی پولیس مرکزی حکومت کے تحت آتی ہے۔