دھنکھڑ سے نہیں ہو پا رہا ہے رابطہ، سنجے راؤت نے وزیر داخلہ کو لکھا خط، ہیبیس کورپس عرضی دائر کرنے کی دی وارننگ

جگدیپ دھنکھڑ نے 21 جولائی کو نائب صدر جمہوریہ کے عہدے سے استعفیٰ دے دیا تھا۔ اس استعفیٰ کی وجہ انہوں نے صحت سے متعلق وجوہات بتائی تھی۔ حیرانی کی بات یہ ہے کہ استعفیٰ دینے کے بعد سے اب تک جگدیپ دھنکھڑ کو کسی نے نہیں دیکھا ہے۔ نہ ہی انہوں نے کسی تقریب میں حصہ لیا ہے۔ اس معاملے کو لے کر اپوزیشن نے حکومت پر سوال کھڑے کرنے سے شروع کر دیے ہیں۔ شیو سینا (یو بی ٹی) رہنما سنجے راؤت نے مرکزی وزیر داخلہ امت شاہ کو خط لکھ کر ’ہیبیس کورپس‘ عرضی داخل کرنے کا انتباہ کیا ہے۔

راجیہ سبھا ایم پی سنجے راؤت نے امت شاہ کو لکھے گئے خط میں نائب صدر جمہوریہ اور راجیہ سبھا کے چیئرمین جگدیپ دھنکھڑ کے اچانک استعفیٰ اور اس کے بعد سے ان کے لاپتہ ہونے پر گہری تشویش کا اظہار کیا۔

سنجے راؤت نے خط میں کہا کہ 21 جولائی کو دھنکھڑ نے ایوان بالا کی کارروائی معمول کے مطابق چلائی تھی اور پوری طرح سے صحت مند دکھائی دے رہے تھے۔ حالانکہ اسی شام انہوں نے صحت وجوہات کا حوالہ دیتے ہوئے استعفیٰ دے دیا۔ راؤت کے مطابق تب تک دھنکھڑ کی صحت یا ٹھکانے کو لے کر کوئی سرکاری اطلاع سامنے نہیں آئی ہے۔

10 اگست کو لکھے گئے اپنے اس خط میں سنجے راؤت نے بتایا کہ کئی اراکین پارلیمنٹ نے دھنکھڑ سے رابطہ کرنے کی کوشش کی لیکن ناکام رہے۔ ان کے اسٹاف سے بھی کوئی جواب نہیں ملا ہے۔ راؤت کا دعویٰ ہے کہ دہلی میں ایسی افواہ پھیل رہی ہے کہ سابق نائب صدر جمہوریہ کو ان کی رہائش میں نظر بند کر دیا گیا ہے اور وہ محفوظ نہیں ہیں۔ انہوں نے اس حالت کو چونکانے اور فکرمندی میں ڈالنے والا بتاتے ہوئے سوال کیا کہ دھنکھڑ کے حالات اور مقام کو لے کر شفافیت کیوں نہیں ہے، جبکہ ملک کو حقیقت جاننے کا حق ہے۔

سنجے راؤت نے اپنے خط میں انکشاف کیا کہ کچھ راجیہ سبھا ایم پی سابق نائب صدر جمہوریہ کی حالت جاننے کے لیے سپریم کورٹ میں ہیبیس کورپس عرضی دائر کرنے پر غور کر رہے ہیں۔ حالانکہ قانونی قدم اٹھانے سے پہلے انہوں نے وزیر داخلہ سے سرکاری جانکاری دینے کا مطالبہ کیا۔ شیو سینا رہنما نے شاہ سے گزارش کی کہ نائب صدرجمہوریہ کے تحفظ اور صحت کو لے کر سچی خبر عام کی جائے تاکہ سبھی افواہوں پر روک لگ سکے۔