ادھو نے کووڈ۔19 کےسلسلے میں تمام سیاسی جماعتوں کے ساتھ کیا تبادلہ خیال

مہاراشٹر کے وزیراعلی ادھو ٹھاکرے نے جمعرات کو اپوزیشن پارٹیوں کے لیڈروں کے ساتھ میٹنگ کرکے کورونا وائرس انفیکشن کے پھیلاؤ کو روکنے کے طریقوں پر تبادلہ خیال کیا۔

میٹنگ میں لاک ڈاؤن کو مرحلہ وار طریقے سے ہٹانے کے منصوبے پر بھی بات چیت کی گئی۔ مہاراشٹر ملک میں کووڈ۔ 19 سے سنگین طور پر متاثر ریاستوں کی فہرست میں پہلے مقام پر ہے۔ ریاست میں بدھ کو کورونا انفیکشن کے 1233 نئے معاملے سامنے آنے کے ساتھ متاثرین کی کل تعداد 16758 ہوگئی ہے۔ مہاراشٹر کی راجدھانی ممبئی کے علاوہ پونے اور تھانے ضلع کووڈ۔ 19 سے بری طرح متاثر ہیں۔ ممبئی میں کورونا کے 10 ہزار سے زیادہ معاملے سامنے آئے ہیں جبکہ پونے اور تھانے میں بالترتیب 2000 اور 1404 معاملے سامنے آئے ہیں۔

صحت اور کنبہ بہبود کی مرکزی وزارت کی جانب سے جمعرات کی صبح جاری کئے گئے تازہ اعداد و شمار کے مطابق گزشتہ 14 گھنٹوں کے دوران مہاراشٹر میں کووڈ۔ 19 سے 34 لوگوں کی موت ہوئی ہے جس سے اس وبا سے مرنے والوں کی تعداد بڑھ کر 651 ہوگئی ہے۔ ریاست میں کورونا کے 3094 مریض مکمل طور پر ٹھیک ہوگئے ہیں، جنہیں اسپتال سے چھٹی دے دی گئی ہے۔

ذرائع کے مطابق مہاراشٹر میں اب تک 190879 نمونوں کی کورونا جانچ کی گئی ہے جس میں سے 173838 کی رپورٹ نیگیٹیو آئی ہے۔

مرکزی حکومت کی رہنما ہدایات کے مطابق ریاست میں 1048 کنٹینمنٹ زون میں کلسٹر کنٹیمنٹ کام کا منصوبہ چلایا جارہا ہے۔

مہاراشٹر میں اس وقت 211122 لوگوں کو گھروں میں ہی کوارنٹائن کیا گیا ہے جبکہ 13107 لوگوں کو مختلف مراکز میں کوارنٹائن کیا گیا ہے۔