ریل مسافروں کے لیے اہم اطلاع، گورکھپور روٹ پر مرمت کے کام کے باعث کئی ٹرینیں منسوخ

ہندوستان میں روزانہ لاکھوں لوگ ریلوے کے ذریعے سفر کرتے ہیں، اور اسے ملک کی ’لائف لائن‘ کہا جاتا ہے۔ تاہم بعض اوقات ٹریک مرمت، سگنلنگ یا انفراسٹرکچر کے کام کے باعث ٹرینوں کی نقل و حرکت متاثر ہوتی ہے۔ اس بار بھی یہی صورتحال گورکھپور روٹ پر سامنے آئی ہے، جہاں اولڈ واشنگ پٹ کے تعمیر نو کے کام کے سبب ریلوے نے کئی دنوں کے لیے کچھ ٹرینیں منسوخ کر دی ہیں۔ ریلوے کے مطابق یہ فیصلہ مسافروں کی حفاظت اور نظام کو بہتر بنانے کے لیے ناگزیر ہے۔

ریلوے کے چیف پبلک ریلیشن آفیسر پنکج کمار سنگھ نے بتایا کہ گورکھپور جنکشن کے اولڈ واشنگ پٹ نمبر 1 اور 2 پر انجینئرنگ کا کام جاری ہے۔ اس کے سبب کچھ ٹرینیں عارضی طور پر نہیں چلیں گی۔ 26 سے 28 فروری کے درمیان گورکھپور–دہلی اسپیشل (05057) اور دہلی–گورکھپور اسپیشل (05058) ٹرینیں منسوخ رہیں گی۔ اسی طرح گورکھپور–باندرہ ٹرمنس اسپیشل (05053) 27 فروری تک، جبکہ باندرہ ٹرمنس–گورکھپور اسپیشل (05054) 28 فروری تک نہیں چلے گی۔

کچھ ٹرینوں کو مکمل طور پر منسوخ کرنے کے بجائے ان کے راستوں کو محدود یا آغاز و اختتام کے اسٹیشنوں میں تبدیلی کی گئی ہے۔ دادر–گورکھپور اسپیشل (01027) مئو جنکشن تک محدود کی گئی ہے اور 26 فروری تک یہی انتظام رہے گا۔ اسی کے برعکس گورکھپور–دادر اسپیشل (01028) مئو سے روانہ ہوگی اور 28 فروری تک یہی نظام برقرار رہے گا۔

اسی طرح باندرہ ٹرمنس–گورکھپور ایکسپریس (22921) صرف بلرامپور تک چلے گی، جبکہ گورکھپور–باندرہ ٹرمنس ایکسپریس (22922) بلرامپور سے شروع ہوگی۔ یہ تبدیلی 22 سے 24 فروری کے درمیان نافذ رہے گی۔ لکنؤ جنکشن–گورکھپور ایکسپریس (15032) کو بھی مختصر کر کے گومتی نگر سے چلانے کا فیصلہ کیا گیا ہے۔

کچھ ٹرینوں کے روٹ کو بڑھایا گیا ہے تاکہ مسافروں کو متبادل سہولت فراہم کی جا سکے۔ لوک مانیہ تلک ٹرمنس–گورکھپور (11055) کو گونڈا تک توسیع دی گئی ہے، جبکہ اس کی واپسی والی ٹرین (11056) گونڈا سے روانہ ہوگی۔ لوک مانیہ تلک ٹرمنس–گورکھپور (20103) کو اعظم گڑھ تک بڑھایا گیا ہے اور اس کی واپسی والی ٹرین (20104) اعظم گڑھ سے روانہ ہوگی۔ اسی طرح صابرمتی–گورکھپور (19409) کو تھاوے تک بڑھایا گیا ہے جبکہ گورکھپور–صابرمتی (19410) تھاوے سے شروع ہوگی۔

پونے–گورکھپور ایکسپریس (11037) کو بڑھنی تک بڑھایا گیا ہے، اور گورکھپور–پونے ایکسپریس (11038) بڑھنی سے چلے گی۔ ان تمام تبدیلیوں کا اطلاق 26 فروری سے 1 مارچ کے درمیان رہے گا۔ ریلوے نے کہا ہے کہ یہ انتظامات عارضی ہیں اور کام مکمل ہوتے ہی معمول کی ٹرین سروس دوبارہ شروع کر دی جائے گی۔

مسافروں سے اپیل کی گئی ہے کہ اگلے چند دنوں میں سفر سے قبل اپنی ٹرین کی موجودہ حالت ضرور چیک کریں، تاکہ کسی بھی قسم کی پریشانی سے بچا جا سکے۔ ریلوے نے واضح کیا ہے کہ مرمت اور توسیع کے یہ اقدامات مستقبل میں بہتر سروس اور حفاظت کو یقینی بنانے کے لیے کیے جا رہے ہیں۔