دہلی میں یکم جولائی کو گرمی نے 89 سالہ ریکارڈ توڑ دیا، فی الحال بارش کا کوئی امکان نہیں

نئی دہلی: شمالی ہندوستان بھر میں شدید گرمی کا سلسلہ جاری ہے۔ راجدھانی دہلی میں جولائی کے پہلے دن نے گرمی کا 89 سالہ ریکارڈ توڑ دیا۔ دہلی میں گزشتہ تین چار دنوں سے درجہ حرارت 43 ڈگری سے زیادہ درج کیا جا رہا ہے، جوکہ معمول سے 7 ڈگری زیاہ ہے اور اگلے دو تین دنوں تک گرمی سے راحت کے آثار نظر نہیں آ رہے ہیں۔

محکمہ موسمیات نے کہا ہے کہ دہلی، پنجاب، ہریانہ اور راجستھان میں گرمی کا سلسلہ بدستور جاری رہے گا۔ آئی ایم ڈی کے علاقائی سربراہ نے جمعرات کے روز کہا کہ دہلی این سی آر میں درجہ حرارت 42-43 ڈگری سیلسیس کے قریب بنا رہے گا۔ تیز ہوائیں چلیں گی اور 2-3 جولائی کو ہلکی بارش کی امید ہے، جس کے بعد درجہ حرارت کم ہو کر 38 ڈگری سیلسیس تک گر سکتا ہے۔

آئی ایم ڈی نے کہا کہ دہلی اور اس کے ملحقہ علاقوں میں 7 جوائی سے قبل مانسون کی بارش ہونے کا کوئی امکان نہیں ہے۔ اس کے بعد علاقہ میں جولائی کے اوائل میں 15 دنوں میں معمول سے کم بارش ہونے کا امکان ظاہر کیا گیا ہے۔ خیال رہے کہ گزشتہ کچھ دنوں سے شمالی میدانی علاقوں میں درجہ حرارت 40 ڈگری سیلسیس سے تجاوز کر گیا ہے۔ جنوب مغربی مانسون ہریانہ، دہلی، مغربی اتر پردیش کے کچھ علاقوں، مغربی راجستھان اور پنجاب کو چھوڑ کر ملک کے باقی حصوں میں پہنچ گیا ہے۔ ہمالیائی بالائی علاقوں میں کئی مقامات پر غیر متوقع طور پر زیادہ درجہ حرارت درج کیا جا رہا ہے۔