بچہ چوری کی افواہوں سے اتر پردیش میں دہشت

اتر پردیش کے الگ الگ مقامات سے بچے چوری ہونے کی افواہیں آرہی ہیں اور ایسی افواہیں سوشل میڈیا کے ذریعہ پھیل رہیں جس کی وجہ سے کئی لوگ بھیڑ کے غصہ کا شکار بھی ہو رہے ہیں۔ بھیڑ کے ذریعہ مار پیٹ کے ویڈیو بھی وائرل ہو رہے ہیں اور پولس جب تک موقع واردات پر پہنچتی ہے بھیڑ تب تک اپنا کام کر چکی ہوتی ہے۔

مغربی اتر پردیش کے شاملی علاقہ میں رسّی فروخت کر رہیں پانچ خواتین کو بھیڑ نے بچے چوری کے شک میں جم کر پیٹا اور ان کا ویڈیو بھی بنایا۔ پولس نے وہاں پہنچ کر تشدد کر رہی اس بھیڑ سے ان خواتین کو بچایا اور تھانے لے آئی، لیکن بھیڑ نے تھانے میں بھی ان پر حملہ کر دیا۔ اس سے قبل21 اگست کو بھی ایک شخص کو بھیڑ نے جم کر پیٹا تھا۔

بلند شہر سے بھی ایک ایسا ہی معاملہ سامنے آیا ہے جس میں ایک شخص کو بچہ چور سمجھ کر خوب پیٹا۔ اس دوران ایک بائیک سوار کی موت بھی ہو گئی۔ بلند شہر میں گزشتہ دنوں ایسے کئی معاملہ سامنے آچکے ہیں لیکن حیرت کی بات یہ ہے کہ بچہ چوری کا ایک بھی معاملہ درج نہیں ہوا ہے۔ بلند شہر کے ایس ایس پی نے کہا ہے کہ افواہ پھیلانے والوں کے خلاف کارروائی کی جائے گی۔

اتر پردیش کے ایٹہ میں ہماچل پردیش کی ایک خاتون کو بچہ چوری کے شک میں بری طرح پیٹ دیا گیا۔ خاتون کی شکایت درج کرلی گئی ہے اور 4 لوگوں کو گرفتار بھی کر لیا گیا ہے۔ اس خاتون کو قریب دس لوگوں نے بچہ چور قرار دیتے ہوئے زبردست پیٹائی کر دی تھی۔

ہاپوڑ کے پلکھوا میں بھیڑ نے ایک بزرگ خاتون کو جم کر پیٹا۔ بھیڑ کا الزام تھا کہ خاتون بچہ چور ہے۔ پولس نے ویڈیو کی بنیاد پر 28 لوگوں کے خلاف معاملہ درج کیا ہے اور ملزمان کی گرفتاری کی کوششیں جاری ہیں۔ یہ واقعہ 23 اگست کو پیش آیا تھا، جب اس خاتون کو پیٹ پیٹ کر لہولہان کر دیا گیا تھا۔

میرٹھ میں بھی ایک ایسا ہی واقعہ پیش آیا جب بھیڑ نے ایک نوجوان کو بچہ چوری کرنے کے شک میں جم کر پیٹ دیا۔ پولس نے بڑی مشکل سے اس نوجوان کو بھیڑ سے بچایا۔

بریلی سے بھی بچے چوری کرنے کے دو معاملہ سامنے آئے ہیں جن کو پولس نے صحیح مانا ہے۔ ایس پی شہر ابھینندن نے بتایا کی کینٹ اور فرید پور علاقہ سے بچے چور پکڑے گئے ہیں۔ یہ لوگ بچوں کو اٹھا رہے تھے اسی دوران بھیڑ نے انہیں دبوچ لیا اور پولس کے حوالہ کر دیا۔ واضح رہے پولس نے ان کی پٹائی کے بارے میں تو کچھ نہیں بتایا جبکہ خبر ہے کہ ان چوروں کو کھمبے سے باندھ کر پیٹا گیا اور ان لوگوں کا ویڈیو بھی بنایا گیا۔