تیر کا نہیں میزائل کا زمانہ ہے، غریبی کا اندھیرا مٹانے کے لئے لالٹین ضروری: تیجسوی

بہار کی اہم اپوزیشن پارٹی راشٹریہ جنتادل ( آرجے ڈی ) اور اپوزیشن کے لیڈر تیجسوی پرساد یادو نے جنتادل یونائٹیڈ ( جے ڈی یو) کے قومی صدر اور وزیراعلیٰ نتیش کمار پر حملہ بولا اور کہا کہ وہ کہتے ہیں کہ ” لالٹین“ کا زمانہ چلا گیا ہے تو شاید انہیں جانکاری نہیں ہے کہ اب ” تیر“ کا نہیں میزائل کا زمانہ ہے۔

تیجسوی پرساد یادو نے پٹنہ ضلع کے مکامہ، جموئی، شیخ پورا اور گیا میں آر جے ڈی کے زیر قیادت مہا گٹھ بندھن کے امیدواروں کے حق میں اتوار کو منعقدہ انتخابی ریلی کو خطاب کرتے ہوئے کہا کہ وزیراعلیٰ نتیش کمار کہتے رہے ہیں کہ اب بہار میں لالٹین ( آرجے ڈی کا انتخابی نشان) کا زمانہ ختم ہو گیا ہے لیکن شاید ان کو پتہ نہیں ہے کہ اب تیر ( جے ڈی یو کا انتخابی نشان) کا بھی زمانہ نہیں رہا، اب تو میزائل کا زمانہ ہے۔ انہوں نے کہا کہ بہار میں بے روزگاری کے اندھیرے کو مٹانے کے لئے لالٹین ضروری ہے اور تیر تو اب کسی کام کا نہیں رہا۔

آر جے ڈی نے ریاست کی نتیش حکومت پر غریبی، بے روزگاری دور نہیں کرنے اور نقل مکانی نہ روک پانے کا الزام عائد کرتے ہوئے کہا کہ اس بار مہا گٹھ بندھن کی حکومت اپنی پہلی کابینہ میٹنگ میں دس لاکھ نوجوانوں کو نوکری دینے کی تجویز کو منظوری دے گی۔

نیوجت اساتذہ کو مساوی کام کے بدلے مساوی تنخواہ کے ان کے سالوں پرانے مطالبات کو بھی پورا کیا جائے گا۔ انہوں نے کہا کہ جے ڈی یو کے تیر نے ریاست کے نوجوانوں کا سینہ چھلنی کر دیا ہے۔

تیجسوی پرساد یادو نے لاک ڈاﺅن میں پھنسے لوگوں کو بہار واپس لانے کے نتیش حکومت کے دعوﺅں پر حملہ تیز کرتے ہوئے کہا کہ کورونا مدت میں حکومت نے چالیس لاکھ سے زائد لوگوں سے منہ پھیر لیا تھا۔ وزیراعلیٰ نتیش کمار نے تو یہاں تک کہہ دیا تھا کہ جو جہاں ہیں وہیں رہے۔ اس سے مایوس ہوکر لوگ 2000 کیلومیٹر پیدل چل کر بہار واپس اپنے گھروں کو لوٹنے لگے۔ لوگوں کے پیروں میں چھالے پڑ گئے۔ بھوک۔ پیاس سے کئی لوگوں نے تو راستے میں ہی دم توڑ دیا۔ انہوں نے دعویٰ کیا کہ اس بار بہار کے کسان اور نوجوانوں نے ڈبل انجن حکومت کو اکھاڑ پھینکنے کا من بنا لیا ہے۔