بہار میں تیجسوی یادو کا ماسٹر اسٹروک! پنچایت کے نمائندوں کے لیے پنشن، انشورنس اور 5 لاکھ روپے امداد کا اعلان کیا

بہارمیں حکومت تبدیلی کے عوامی رجحان سے پر جوش کانگریس زیر قیادت مہا گٹھ بندھن کے رہنماوں نے اسمبلی انتخابات میں بڑی کامیابی درج کرانے کے لئے اپنی انتخابی مہم تیز کردی ہے۔ اس دوران مہا گٹھ بندھن کی جانب سے وزیراعلیٰ عہدے کا چہرہ اور آر جے ڈی لیڈر تیجسوی یادو نے اتوار کو ایک اور بڑا وعدہ کیا۔ انہوں نے بہار اسمبلی انتخابات میں مہا گٹھ بندھن کے اقتدار میں آنے پر پنچایت کے نمائندوں کو 50 لاکھ روپے کی پنشن اور انشورنس کور دینے کا وعدہ کیا ہے۔

بہار کی راجدھانی پٹنہ میں ایک پرہجوم پریس کانفرنس سے خطاب کرتے ہوئے تیجسوی یادو نے کہا کہ انتخابی مہم تیز ہو گئی ہے اور بہار تبدیلی کے لیے بے چین ہے۔ موجودہ نتیش کمار حکومت پر طنز کرتے ہوئے انہوں نے کہا کہ بہار میں 20 سالوں سے کھٹارا سرکار ہے مگر اب عوام تبدیلی کے لیے بے چین ہے۔ انہوں نے کہا کہ وہ جہاں بھی جاتے ہیں، تمام ذاتوں اور مذاہب کے لوگ ان کی حمایت کے لیے بڑی تعداد میں سامنے آرہے ہیں۔ آرجے ڈی لیڈر نے کہا کہ عوام بہار کی موجودہ حکومت سے تنگ آچکے ہیں اور اسے بدلنا چاہتے ہیں۔ اس حکومت میں بدعنوانی اور جرائم عروج پر ہیں اور لوگ بی جے پی کو سمجھ چکے ہیں۔

بی جے پی اور امیت شاہ پر طنز کرتے ہوئے تیجسوی یادو نے کہا کہ بہار میں جان بوجھ کر کارخانے نہیں لگنے دیئے گئے۔ سابق نائب وزیراعلیٰ نے اپنی حکومت کی کامیابیوں کو بتاتے ہوئے کہا کہ 17 مہینوں میں بہت کام ہوا تھا، چاچا جی نہیں پلٹے ہوتے تو اور بھی کام ہوتا۔ کانگریس اور اتحاد کے بارے میں آر جے ڈی لیڈر نے کہا کہ وہ ایک ساتھ انتخابی مہم چلا رہے ہیں اور مستقبل میں راہل گاندھی اور پرینکا گاندھی کے ساتھ انتخابی مہم بھی شروع کریں گے۔ انہوں نے کہا کہ تیجسوی نے کسی کا نقصان نہیں کیا ہے اور نہ تیجسوی سے کسی کو شکایت ہے۔ بہار کے عوام نے پچھلی حکومت کو 20 سال دیے اور اب ہم صرف 20 مہینے مانگ رہے ہیں۔

تیجسوی یادو نے اپنی حکومت کے قیام کے وعدوں کی فہرست بیان کرتے ہوئے کہا کہ پنچایتی نمائندوں کا اعزازیہ دوگنا کردیا جائے گا۔ اس کے علاوہ سونار، حجام، لوہار اور بڑھئی پیشے سے وابستہ افراد کو خود روزگار کے لیے یکمشت پانچ لاکھ روپے دیئے جائیں گے۔ تیجسوی یادو نے بہار میں صنعتوں کی کمی کو لے کر مودی حکومت کو نشانہ بناتے ہوئے کہا کہ ریاست میں بڑی بڑی فیکٹریوں اور آئی ٹی پارک سمیت تمام صنعتوں کو گجرات لے جایا گیا اور بہار کو صرف دھوکہ دیا گیا اور ٹھینگا دکھایا گیا۔ تیجسوی یادو نے عوام سے حاصل ہو رہی حمایت کا شکریہ ادا کرتے ہوئے کہا کہ ریاست میں مہاگٹھ بندھن کی حکومت بننے کے بعد ریاست کی ترقی اوراپنے عوام کی بہبود کے لئے ہم ہر ممکن اقدمات کریں گے۔