پارلیمنٹ احاطے میں گاڑیوں کی رفتار پر لگے گا بریک، ممبران پارلیمنٹ کے لیے نئی ایڈوائزری جاری

بجٹ اجلاس کے دوسرے مرحلے سے پہلے پارلیمنٹ سیکورٹی سروس نے ممبران پارلیمنٹ اور ان کے ڈرائیوروں کے لیے اہم حفاظتی رہنما خطوط جاری کیے ہیں۔ نئی ہدایات کے مطابق پارلیمنٹ کمپلیکس کے داخلی راستوں پر گاڑیوں کی رفتار کی حد 10 کلومیٹر فی گھنٹہ مقرر کی گئی ہے۔ بتا دیں کہ پیر سے پارلیمنٹ کا اجلاس شروع ہونے والا ہے۔

سیکورٹی سروس نے خبردار کیا ہے کہ اگر کوئی گاڑی مقررہ رفتار کی حد سے تجاوز کرتی ہے تو داخلی راستوں پر نصب جدید ترین حفاظتی آلات جیسے ٹائر کلرز اور روڈ بلاکرز خود بخود متحرک ہو سکتے ہیں۔ ایسی صورت میں گاڑی کو اچانک روکنا مشکل ہو جائے گا جس سے نہ صرف گاڑی کو شدید نقصان پہنچ سکتا ہے بلکہ اس میں سوار افراد زخمی بھی ہو سکتے ہیں۔

ایڈوائزری میں واضح کیا گیا ہے کہ بوم بیریئر کو عبور کرتے وقت 2 گاڑیوں کے درمیان کم از کم 5 فٹ کا فاصلہ برقرار رکھنا لازمی ہے، کیونکہ سسٹم ایک وقت میں صرف ایک گاڑی کی اجازت دیتا ہے۔ 13 دسمبر 2001 کے دہشت گردانہ حملے کے بعد سے پارلیمنٹ کے سیکورٹی نظام کو وقتاً فوقتاً اپ گریڈ کیا جاتا رہا ہے۔ اس سلسلے میں ممبران پارلیمنٹ سے کسی بھی ناخوشگوار واقعے یا تکنیکی خرابی سے بچنے کے لیے سیکورٹی پروٹوکول پرعمل کرنے کی اپیل کی گئی ہے۔