بنگال: راجیو کمار کو جھٹکا، ذیلی عدالت کا عبوری ضمانت عرضی پر سماعت سے انکار

بیرک پور: شاردا چٹ فنڈ معاملہ میں کولکاتا کے سابق پولس کمشنر راجیو کمار کو منگل کے روز اس وقت جھٹکا لگا جب مغربی بنگال کے ضلع شمالی 24 پرگنہ کے باراست میں سی بی آئی کی خصوصی عدالت نے ان کی عبوری ضمانت عرضی پر سماعت کرنے سے انکار کردیا۔

ضمانت کے لئے عرضی منگل کی صبح کو ہی راجیو کمار کے وکیل کی طرف سے عدالت میں داخل کی گئی تھی جس پر عدالت نے کہا کہ اس پر سماعت اس کے دائرہ اختیار سے باہر ہے۔ راجیو کمار کو ضلع جج کی عدالت میں عرضی داخل کرنے کی ہدایت دی گئی ہے۔ ضلع کی باراسات عدالت کے جج سنجیو تالوکا نے راجیو کمار کے وکیل سے کہا کہ یہ ایک ذیلی عدالت ہے اور اس عرضی پر سماعت کا اختیار اس کے دائرے میں نہیں آتا۔

واضح رہے کہ 13 ستمبر کو کولکتہ ہائی کورٹ نے کولکاتا کے سابق پولس کمشنر کو شاردا چٹ فنڈ گھوٹالہ معاملہ میں گرفتاری سے تحفظ کے اپنے عبوری حکم کو واپس لے لیا تھا۔ عدالت عالیہ نے سی بی آئی کے نوٹس کو منسوخ کرنے سے متعلق راجیو کمار کی عرضی کو بھی منسوخ کر دیا تھا۔

راجیو کمار موجودہ وقت میں مغربی بنگال سی آئی ڈی میں ایڈیشنل ڈائریکٹر ہیں۔ وہ گھوٹالہ کی جانچ کے لئے ریاستی حکومت کی طرف سے تشکیل شدہ تفتیشی ٹیم میں شامل تھے۔ عدالت عظمی نے 2014 میں چٹ فنڈ کے دیگر معاملوں کے ساتھ اس معاملہ کی جانچ سی بی آئی کے حوالہ کی تھی۔