کانگریس اقتدار میں ہو یا نہیں لیکن وہ ہمیشہ عوام کے ساتھ کھڑی ہے، سونیا گاندھی

لاک ڈاؤن کی مدت ختم ہونے کے آخری دن کانگریس صدر سونیا گاندھی نے ویڈیو کے ذریعہ قوم سے خطاب کرتے ہوئے کورونا وائرس کے خلاف اس لڑائی کو لڑنے کے لئے عوام کا شکریہ ادا کیا۔ سونیاگاندھی نے جہاں ڈاکٹرس، طبی اہلکار، صفائی ملازمین اور سماجی خدمت گار کی اس لڑائی میں خاص طور سے تعریف کی وہیں انہوں نے یہ بھی کہا کہ یہ تمام لوگ ملک کے عوام کے لئے اپنی جان کو خطرے میں ڈال کر اور حفاظتی انتظامات کے فقدان کے باوجود بڑے حوصلہ سے کام کر رہے ہیں۔

سونیا گاندھی نے اس لڑائی میں عوام کے تعاون کی تعریف کی لیکن انہوں نے ان واقعات کی بھی مزمت کی جن میں طبی اہلکار کو پیٹا گیاہے۔ انہوں نے کہا کہ کانگریس چاہے اقتدار میں ہو یا اپوزیشن میں وہ ہمیشہ عوام کے لئے عوام کے ساتھ کھڑی ہوئی ہے۔

سونیا گاندھی نے کہا کہ جن لوگوں کو بھی کوئی پریشانی ہو وہ کانگریس کارکنان سے رابطہ کر سکتے ہیں اور کانگریس کے کنٹرول روم سے بھی رجوع کر سکتے ہیں۔ واضح رہے کل کانگریس صدر سونیاگاندھی نے وزیر اعظم کو ایک اور خط لکھا تھاجس میں انہوں کہا تھا کہ فوڈ سیکورٹی قانون کے تحت غریبوں کو ستمبر 2020 تک مفت اناج مہیا کیا جائے۔ سونیا گاندھی نے گزارش کی تھی کہ جو غریب فوڈ سیکورٹی قانون کے دائرے میں نہیں آتے ہیں، انھیں بھی حکومت ستمبر تک اناج دستیاب کرائے۔ قابل ذکر ہے کہ اس وقت نریندر مودی حکومت نے جون مہینے تک مفت اناج دینے کا اعلان کیا ہے۔

سونیا گاندھی کا کہنا تھا کہ قومی فوڈ سیکورٹی قانون کے تحت اپریل سے جو ن تک فی کس 5 کلو اضافی مفت اناج دینے کا فیصلہ قابل تعریف ہے۔ لیکن لاک ڈاؤن کے طویل اثٖرات کی وجہ سے وہ حکومت کو کچھ مشورہ دینا چاہتی ہیں۔ سونیا نے لکھا تھا کہ سب سے پہلے تو قومی فوڈ سیکورٹی قانون سے فائدہ اٹھانے والوں کو 10 کلو فی کس اناج دینے کی مدت کو 3 مہینے کے لیے مزید یعنی کہ ستمبر 2020 تک بڑھا دیا جانا چاہیے۔ سونیا نے کہا کہ غریبوں کے سامنے موجود معاشی دشواری کو دیکھتے ہوئے حکومت چاہے تو انھیں مفت اناج دے سکتی ہے۔