سانپ کا زہر معاملہ: یوٹیوبر ایلوش یادو کو سپریم کورٹ سے ملی راحت، ایف آئی آر رد کرنے کا حکم

مشہور یوٹیوبر ایلوش یادو کو سپریم کورٹ سے آج راحت بھری خبر ملی۔ عدالت نے ان کے خلاف ویڈیو شوٹ میں سانپ کا زہر استعمال کرنے اور ڈرگ استعمال والی ریو پارٹیوں میں شامل ہونے کے الزامات میں درج مجرمانہ کارروائی کو رد کر دیا ہے۔ سپریم کورٹ کا کہنا ہے کہ محدود قانونی ایشوز کی بنیاد پر ایف آئی آر قانون کی نظر میں قابل قبول نہیں ہے۔

جسٹس ایم ایم سندریش اور جسٹس این کوٹیشور سنگھ کی بنچ نے واضح کیا کہ وہ صرف 2 خاص سوالات پر غور کر رہے ہیں۔ یہ سوالات ہیں نارکوٹکس ڈرگ اینڈ سائیکوٹراپک سبسٹانسز ایکٹ 1985 کی دفعہ 2(23) کے اطلاق اور وائلڈ لائف (تحفظ) ایکٹ 1972 کی دفعہ 55 کے تحت کارروائی کے جواز کو لے کر۔

این ڈی پی ایس سے جڑے معاملہ میں عدالت نے سینئر ایڈووکیٹ مکتا گپتا کی اس دلیل کو ریکارڈ کیا کہ ایک شریک ملزم سے برآمد کیا گیا مبینہ سائیکوٹراپک شئے (سانپ کے زہر کا اینٹی ڈوٹ) این ڈی پی ایس ایکٹ کے دائرے میں نہیں آتا ہے۔ بنچ نے اس بات پر غور کیا کہ جیسا کہ منظور کیا گیا ہے، زیر غور اشیا آئینی شیڈول کے تحت نہیں آتا تھا۔ عدالت نے اس دلیل پر بھی توجہ دی کہ ایلوش یادو سے خود کوئی برآمدگی نہیں ہوئی تھی اور چارج شیٹ میں صرف یہ الزام عائد کیا گیا تھا کہ اس نے ایک معاون کے ذریعہ آرڈر دیے تھے۔

اس بات کو دھیان میں رکھتے ہوئے عدالت نے اخذ کیا کہ پیش کردہ ثبوتوں کی بنیاد پر این ڈی پی ایس ایکٹ کو نافذ کرنا قانونی طور پر درست نہیں تھا۔ وائلڈ لائف تحفظ ایکٹ سے جڑے دوسرے ایشو پر آتے ہوئے بنچ نے کہا کہ سیکشن 55 کے تحت یہ ضروری ہے کہ مقدمہ صرف کسی ایسے افسر کی شکایت پر ہی شروع کیا جا سکتا ہے، جسے اس کے لیے قانونی اختیار دیا گیا ہو۔ جس شکایت کی بنیاد پر یہ ایف آئی آر درج کی گئی تھی، وہ گورو گپتا نام کے ایک شخص نے داخل کی تھی، جو ’پیپل فار اینیملس‘ (پی ایف اے) نامی ایک مویشی فلاح تنظیم سے منسلک ہے۔

عدالت عظمیٰ نے یہ مانا کہ ایف آئی آر اپنی موجودہ شکل میں غور کے قابل نہیں تھی، کیونکہ اسے کسی اہل اتھارٹی کے ذریعہ داخل نہیں کیا گیا تھا۔ عدالت نے شکایت دہندہ کی خیر سگالی پر بھی شبہ ظاہر کیا۔ عدالت نے یہ دلیل بھی درج کی کہ تعزیرات ہند کے تحت جرم علیحدہ طور سے نہیں بنتے تھے، کیونکہ وہ ایک پچھلی شکایت کا حصہ تھے جسے پہلے ہی بند کیا جا چکا تھا۔ اس نتیجہ پر پہنچتے ہوئے کہ ان قانونی بنیادوں پر ایف آئی آر جانچ میں کھری نہیں اتر سکتی، بنچ نے کارروائی کو منسوخ کرنے کا حکم دیا۔ حالانکہ اس نے یہ واضح کیا کہ اس نے بنیادی الزامات کی میرٹ کی بنیاد پر جانچ نہیں کی ہے۔