ایس آئی آر: وی وی ایس لکشمن، مہیش بابو، راجامولی اور سائنا نہوال جیسی کئی بڑی ہستیوں کو الیکشن کمیشن نے بھیجا نوٹس!

تلنگانہ کی راجدھانی حیدرآباد کی کئی معروف شخصیات کو الیکشن کمیشن کی خصوصی گہری نظرثانی یعنی ایس آئی آر عمل کے تحت نوٹس بھیجا گیا ہے۔ اس فہرست میں مشہور و معروف اداکار مہیش بابو، فلم ڈائریکٹر ایس ایس راجامولی، سابق کرکٹر وی وی ایس لکشمن اور بیڈمنٹن کھلاڑی سائنا نہوال جیسے بڑے نام شامل ہیں۔ اس خبر نے مذکورہ فلمی ہستیوں اور کھلاڑیوں کے چاہنے والوں کو حیران کر دیا ہے۔ یہ پورا معاملہ ووٹر لسٹ کی جانچ سے متعلق ہے اور اس میں فلمی دنیا، کھیلوں کی دنیا اور کاروبار سے وابستہ کئی اہم شخصیات کے نام بھی سامنے آئے ہیں۔

میڈیا رپورٹس میں ذرائع کے حوالہ سے بتایا گیا ہے کہ اس فہرست میں مہیش بابو کے ساتھ ان کی اہلیہ نمرتا، ایس ایس راجامولی، وینکٹیش دگوبتی اور ان کی بیٹیاں، سامنتھا رُتھ پربھو، وجے دیوراکونڈا، آنند دیوراکونڈا، وی وی ایس لکشمن، متھالی راج، پلیلا گوپی چند، سائنا نہوال، مرلی کرشن پرساد دیوی اور اپاسنا کونڈیڈیلا کے نام شامل ہیں۔ یعنی یہ فہرست صرف فلمی ستاروں تک محدود نہیں ہے بلکہ اس میں کھیل اور کاروباری دنیا سے وابستہ کئی لوگ موجود ہیں۔

اب سوال یہ ہے کہ آخر یہ نوٹس کیوں بھیجا گیا ہے۔ سامنے آئی جانکاری کے مطابق یہ پوری کارروائی ووٹر لسٹ کو درست کرنے اور اسے اپڈیٹ کرنے کے لیے چلائی جا رہی ہے۔ کچھ معاملوں میں لوگوں کے نام یا ان کے والدین کے نام میں خامی پائی گئی ہے، کچھ لوگوں کا ریکارڈ پرانے ایس آئی آر ڈاٹا سے مطابقت نہیں رکھتا ہے، جبکہ کچھ معاملات میں نوٹس بھیجنے کی کوئی خاص وجہ بھی نہیں بتائی گئی ہے۔

انتخابی حکام نے واضح کیا ہے کہ جن لوگوں کو یہ نوٹس ملا ہے، وہ خود جا کر تصدیق کرا سکتے ہیں اور ضروری دستاویزات جمع کر سکتے ہیں۔ اگر کسی نام میں غلطی ہے تو اسے درست بھی کرایا جا سکتا ہے۔ جو لوگ خود موجود نہیں ہو پائیں گے، وہ کسی دوسرے شخص کو اپنی جانب سے سماعت میں بھیجنے کے لیے مجاز بنا سکتے ہیں۔ سب سے اہم بات یہ ہے کہ صرف نوٹس ملنے کا مطلب یہ نہیں ہے کہ کسی شخص کو ووٹ دینے کے لیے نااہل قرار دے دیا گیا ہے یا اس کا ووٹر رجسٹریشن منسوخ ہو گیا ہے۔ ڈرافٹ ووٹر لسٹ جاری ہونے کے بعد یہ پوری کارروائی جانچ اور اصلاح کے عام عمل کا ہی حصہ ہے۔