رینوکا سوامی قتل معاملہ: کنڑ اداکار درشن کو سپریم کورٹ سے جھٹکا، ضمانت منسوخ، فوراً گرفتاری کا حکم

کنڑ فلموں کے مشہوراداکار درشن تھوگودیپا کی مشکلیں مسلسل بڑھتی جا رہی ہیں۔ اداکار کو رینوکا سوامی قتل معاملے میں سپریم کورٹ نے بڑھا جھٹکا دیا ہے۔ عدالت ٰدرشن کو ایک فین (رینوکا سوامی) کے قتل معاملے میں کرناٹک ہائی کورٹ سے ملی ضمانت کو منسوخ کر دیا ہے۔ اس کے علاوہ عدالت نے درشن کو فوری طور پر گرفتار کرنے کا بھی حکم دیا ہے۔ یہ فیصلہ جسٹس جے بی پاردیوالا اور جسٹس آر مہادیون کی بنچ نے سنایا۔ سماعت کے دوران دونوں فریقوں کی دلیلیں سننے کے بعد بنچ نے 24 جولائی کو اپنا فیصلہ محفوظ رکھ لیا تھا۔

سپریم کورٹ نے کرناٹک ہائی کورٹ کے فیصلے کو پلٹتے ہوئے کہا کہ پولیس درشن کو فوراً گرفتار کرے۔ وہیں اس معاملے میں عدالت نے درشن کے علاوہ پوترا گوڑا اور 5 دیگر ملزمین کی بھی ضمانت منسوخ کر دی ہے۔

اس حکم کے علاوہ عدالت نے جیل میں ملزمین کو خصوصی سہولت فراہم کیے جانے کو لے کر بھی انتباہ کیا ہے۔ عدالت نے کہا، ’’جس دن ہمیں پتہ چلے گا کہ ملزمین کو پانچ ستارہ سہولت فراہم کی جا رہی ہے...اس دن ہمارا پہلا قدم ایس پی اور دیگر سبھی افسروں کو معطل کرنے کا ہوگا۔‘‘

دراصل رینوکا سوامی قتل معاملے میں درشن پر پولیس نے سنگین الزام لگائے تھے جس کے بعد سپریم کورٹ کا بھی سخت رویہ اس مقدمے میں نظر آیا۔ پولیس کا الزام تھا کہ درشن نے متاثرہ کو جون 2024 میں 3 دنوں کے لیے بنگلورو کے ایک شیڈ میں رکھا تھا۔ وہاں پر اس کو اذیتیں دیں۔ متاثرہ کی لاش بعد میں ایک نالے سے برآمد کی گئی۔ اس میں درشن کے ساتھ اور لوگ بھی شامل تھے جن کے خلاف کارروائی کی گئی تھی۔ اس کے بعد اس معاملے میں کرناٹک ہائی کورٹ نے بھی 6 ملزمین کو ضمانت دینے کا فیصلہ کیا تھا، جس کی بعد میں سپریم کورٹ نے مخالفت کی تھی اور کہا تھا کہ یہ صوابدیدی طاقت کا غلط استعمال ہے۔

قابل ذکر ہے کہ درشن تھوگودیپا خاص طور سے کنڑ سنیما میں فعال رہتے ہیں اور انہیں فلم انڈسٹری میں کام کرتے ہوئے دو دہائی گزر چکے ہیں۔ وہ 48 سال کے ہیں اور تنازعوں سے ان کا پرانا رشتہ رہا ہے۔ سال 2011 میں اداکار کی اہلیہ نے ان پر گھریلو تشدد کا مقدمہ درج کرایا تھا۔ اس کے بعد 2021 میں ان پر ایک ویٹر کے ساتھ ہاتھا پائی کرنے کا الزام لگا تھا۔ یہی نہیں 2023 میں بھی ان کا نام اس وقت تنازعہ میں آیا تھا جب انہوں نے اپنے پالتو کتے کو پڑوسی کے آگے کاٹنے کے لیے چھوڑ دیا تھا۔ اب قتل معاملے میں سپریم کورٹ کے فیصلہ نے کنڑ اداکار درشن کی مشکلیں مزید بڑھا دی ہیں۔