’ماب لنچنگ‘ کے شکار ہری اوم والمیکی کے اہل خانہ سے راہل گاندھی نے دہلی میں کی ملاقات، ہر ممکن مدد کا دلایا بھروسہ

’ماب لنچنگ‘ کے سبب اپنی جان گنوانے والے دلت نوجوان ہری اوم کے اہل خانہ سے راہل گاندھی نے دہلی میں ہفتہ (29 نومبر) کو ملاقات کی۔ لوک سبھا میں حزب اختلاف کے رہنما اور کانگریس رہنما راہل گاندھی سے ہری اوم کے والدین اور ان کی چھوٹی بہن کی ملاقات 10 جن پتھ پر ہوئی۔ راہل گاندھی نے اہل خانہ کو یقین دلایا کہ وہ ان کی لڑائی کو آخری دم تک لڑیں گے اور اہل خانہ کو ضرور انصاف دلائیں گے۔

راہل گاندھی سے ملاقات کے بعد ہری اوم کی چھوٹی بہن نے ان کا شکریہ ادا کیا۔ ہری اوم کی بہن نے نامہ نگاروں سے بات کرتے ہوئے کہا کہ ’’ہم راہل گاندھی سے ملنے اور ان کا شکریہ ادا کرنے کے لیے 10 جن پتھ آئے تھے۔ ہمارے مشکل وقت میں وہ کندھے سے کندھا ملا کر کھڑے تھے، انہوں نے مکمل طور پر ہمارا ساتھ دیا۔ شروع سے آخر تک کی لڑائی وہی لڑ رہے ہیں اس لیے ہم ان کا شکریہ ادا کرنا چاہتے ہیں۔‘‘

ہری اوم کی بہن نے میڈیا سے یہ بھی کہا کہ ’’ہمارا راہل گاندھی سے کوئی مطالبہ نہیں تھا۔ ہم صرف ان کا شکریہ ادا کرنا چاہتے تھے۔ اس (ماب لنچنگ) معاملہ میں کچھ کو گرفتار کیا گیا ہے وہ سب جیل کے اندر ہیں۔ ابھی کارروائی کی جا رہی ہے، دیکھتے ہیں آگے کیا ہوتا ہے۔ انہوں نے کہا ہے کہ آپ پریشان نہ ہوں، ہم آپ کے ساتھ کھڑے ہیں، تمام لڑائی ہم آپ کے ساتھ مل کر لڑیں گے۔‘‘

واضح رہے کہ گزشتہ ماہ 2 اکتوبر کو دلت نوجوان ہری اوم والمیکی کو رائے بریلی میں پیٹ پیٹ کر قتل کر دیا گیا تھا۔ ملزمان جب اس کی پٹائی کر رہے تھے تو اس نے اپنی جان بچانے کے لیے راہل گاندھی کا نام لیا تھا، اس کے باوجود مسلسل ان کی پٹائی کی گئی تھی۔ اس انسانیت سوز واقعہ کے بعد لوگوں میں کافی غم و غصہ دیکھا گیا تھا۔ کانگریس لیڈر راہل گاندھی ہری اوم والمیکی کے گھر جا کر ان کے اہل خانہ سے ملاقات کی تھی اور پورے واقعہ کے متعلق جانکاری بھی لی تھی۔