کانگریس جنرل سکریٹری پرینکا گاندھی نے راہل گاندھی کے خلاف ہوئی کارروائی پر اپنے شدید رد عمل کا اظہار کرتے ہوئے کہا کہ ’’ہماری رَگوں میں شہیدوں کا خون ہے، جو اس ملک کے لیے بہا ہے۔ ہم ڈَٹ کر لڑیں گے، ہم ڈرنے والے نہیں ہیں۔‘‘ ساتھ ہی انھوں نے کہا کہ ’’راہل گاندھی جی کے اڈانی-مودی کے رشتوں پر حکومت جواب دینا نہیں چاہتی اور ان کے خلاف کارروائی اسی کا نتیجہ ہے۔‘‘
Published: 24 Mar 2023, 3:57 PM IST
راہل گاندھی کی لوک سبھا رکنیت ختم کیے جانے کے بعد کانگریس کے سرکردہ لیڈران کی میٹنگ دہلی واقع پارٹی ہیڈکوارٹر میں ہوئی۔ اس میٹنگ کے بعد خبریں سامنے آ رہی ہیں کہ راہل گاندھی کل یعنی ہفتہ کے روز دوپہر میں پریس کانفرنس سے خطاب کریں گے۔
Published: 24 Mar 2023, 3:57 PM IST
دہلی کے وزیر اعلیٰ اروند کیجریوال نے راہل گاندھی کی لوک سبھا رکنیت ختم کیے جانے پر مرکز کی مودی حکومت کو تنقید کا نشانہ بنایا ہے۔ انھوں نے ایک ویڈیو بیان جاری کیا ہے جس میں کہا ہے کہ ’’آج ملک میں جو چل رہا ہے وہ بہت خطرناک ہے۔ اپوزیشن کو ختم کر کے یہ لوگ وَن نیشن وَن پارٹی کا ماحول بنانا چاہتے ہیں۔ اسی کو تو تاناشاہی کہتے ہیں۔‘‘ ساتھ ہی انھوں نے ہندوستانی عوام سے اپیل کی ہے کہ ’’ہمیں مل کر آگے آنا ہوگا، جمہوریت کو بچانا ہے، ملک بچانا ہے۔‘‘
Published: 24 Mar 2023, 3:57 PM IST
کانگریس لیڈر راہل گاندھی نے لوک سبھا رکنیت منسوخ کیے جانے کے بعد بذریعہ ٹوئٹ اپنے عزائم کا اظہار کیا ہے۔ انھوں نے اپنے خلاف ہوئی کارروائی کے بعد ایک ٹوئٹ کیا ہے جس میں لکھا ہے ’’میں ہندوستان کی آواز کے لیے لڑ رہا ہوں۔ میں ہر قیمت چکانے کو تیار ہوں۔‘‘
Published: 24 Mar 2023, 3:57 PM IST
کانگریس لیڈر راہل گاندھی کی لوک سبھا رکنیت ختم کیے جانے کو سازش قرار دیتے ہوئے کانگریس نے ہندوستانی جمہوریت کے لیے آج کے دن کو یومِ سیاہ بتایا ہے۔ کانگریس جنرل سکریٹری اور کرناٹک انچارج رندیپ سنگھ سرجے والا نے اپنے ایک ٹوئٹ میں لکھا ہے کہ ’’جمہوریت میں آج یومِ سیاہ ہے! آج بولنے کے حق پر داغ لگا ہے! آج بھگوڑوں اور بینک جعلسازوں کو بلاوا دینے کی موت کی گھنٹی ہے!‘‘ ساتھ ہی وہ لکھتے ہیں کہ ’’آج اڈانی میں جے پی سی کے مطالبہ کے لیے پی ایم کے اندھے بدلا کا دن ہے! آج کا دن سچائی کے لیے لڑنے اور جھکنے کا نہیں ہے!‘‘
Published: 24 Mar 2023, 3:57 PM IST
راہل گاندھی کی لوک سبھا رکنیت ختم ہونے کے بعد کانگریس نے پریس کانفرنس کر مرکز کی مودی حکومت پر شدید حملہ کیا۔ کانگریس لیڈر ابھشیک منو سنگھوی نے میڈیا اہلکاروں سے خطاب کرتے ہوئے کہا کہ ’’قانون سے پہلے یہ سیاسی ایشو ہے۔ ملک میں 2014 کے بعد سے اظہارِ رائے کی آزادی پر حملہ کیا جا رہا ہے۔ سرکاری اداروں کا استحصال کیا جا رہا ہے۔ راہل گاندھی بے خوف ہو کر بیان دیتے ہیں، اور راہل کو سچ بولنے کی سزا ملی ہے۔‘‘ سنگھوی نے الزام عائد کرتے ہوئے کہا کہ جمہوریت کا گلا گھونٹا جا رہا ہے اور ایسے میں خاموش نہیں بیٹھا جا سکتا۔
Published: 24 Mar 2023, 3:57 PM IST
بہار حکومت میں وزیر تیج پرتاپ یادو نے راہل گاندھی کی لوک سبھا رکنیت ختم کیے جانے کو ایک سازش کا حصہ قرار دیا ہے۔ انھوں نے اپنے بیان میں کہا کہ ’’یہ سازش کے تحت ہوا ہے۔ یہ سب ایک سازش کا حصہ ہے۔ جو کچھ بی جے پی کر رہی ہے اسے بہار اور پورے ملک کے لوگ دیکھ رہے ہیں۔ سب کچھ ان کے احکامات پر ہو رہا ہے۔‘‘
Published: 24 Mar 2023, 3:57 PM IST
کانگریس لیڈر راہل گاندھی کی لوک سبھا رکنیت رد ہونے کے بعد کانگریس صدر ملکارجن کھڑگے نے بی جے پی کو تنقید کا نشانہ بناتے ہوئے کہا ہے کہ ’’انھوں نے (بی جے پی) انھیں (راہل گاندھی کو) نااہل ٹھہرانے کے سبھی طریقے آزمائے۔ جو سچ بول رہے ہیں انھیں وہ رکھنا نہیں چاہتے، لیکن ہم سچ بولتے رہیں گے۔ ہم جے پی سی کا مطالبہ جاری رکھیں گے۔ ضرورت پڑی تو جمہوریت بچانے کے لیے جیل جائیں گے۔‘‘
Published: 24 Mar 2023, 3:57 PM IST
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: 24 Mar 2023, 3:57 PM IST
تصویر: بشکریہ محمد تسلیم
تصویل: کانگریس میڈیا ڈپارٹمنٹ
تصویر: پریس ریلیز
تصویر: بشکریہ محمد تسلیم