تمل ناڈو میں آر ایس ایس-بی جے پی پر خوب برسے راہل گاندھی، کانگریس اتحاد کو کامیاب بنا کر ریاست کی زبان و ثقافت بچانے کی اپیل

اسمبلی انتخابات 2026 کے سلسلے میں ووٹنگ کی تیاریوں کے آخری مرحلے میں تمل ناڈو کا سیاسی درجہ حرارت اپنے شباب پر پہنچ چکا ہے۔ ریاست میں کانگریس اور حکمراں ڈی ایم کے اتحاد کی انتخابی مہم میں عوام کی زبردست شرکت سے پارٹی رہنماؤں اور کارکنان میں زبردست جوش دیکھا جارہا ہے۔ وہیں اس جوش وخروش میں مزید شدت پیدا کرنے لوک سبھا میں اپوزیشن لیڈر راہل گاندھی نے آج ریاست کا دورہ کیا اور انتخابی جلسے کو خطاب کرکے ملک کی ترقی اور قوم کے اتحاد کے لیے کانگریس زیرقیادت اتحاد کو کامیاب بنانے کی اپیل کی۔

کانگریس کے سینئر رہنما راہل گاندھی پارٹی کی انتخابی مہم  کے تحت کنیا کماری کے نن گنیری میں منعقد ایک بڑے جلسہ عام کو خطاب کرتے ہوئے بھارتیہ جنتا پارٹی (بی جے پی) اور اس کی نظریاتی تنظیم راشٹریہ سوئم سیوک سنگھ (آرایس ایس) کو نشانہ بنایا۔ کانگریس کے سابق صدر نے اپوزیشن اے آئی اے ڈی ایم کے پر براہ راست طور پر بی جے پی کے سامنے خودسپردگی کرنے کا الزام لگاتے ہوئے کہا کہ ملک کے عوام اچھی طرح دیکھ رہے ہیں اور سمجھ رہے ہیں کہ کون ملک کی ترقی کے لیے الیکشن لڑرہا ہے اور کون صرف دوستوں کو فائدہ پہنچانے کے لیے لوگوں کے ووٹ حاصل کرنے کی کوشش کررہا ہے۔

راہل گاندھی نے پیر کے روز بی جے پی اور اس کی اتحادی اے آئی اے ڈی ایم کے کو نشانہ بناکر ریاست کے سیاسی جغرافیہ کو چیلنج کیا جس سے صوبائی سیاست میں نئی ہلچل پیدا ہوگئی ہے۔ اس جلسہ عام میں بڑی تعداد میں کانگریس رہنماؤں کے ساتھ عوامی سیلاب نظر آرہا تھا۔ اس موقع پر راہل گاندھی نے الزام لئگایا کہ اے آئی اے ڈی ایم کے لیڈروں نے بدعنوانی کی وجہ سے بی جے پی کے سامنے خود سپردگی کردی ہے۔ انہوں نے کہا کہ ریاست میں بی جے پی اپنی پکڑ مضبوط کرنے کے لیے اے آئی اے ڈی ایم کے کا استعمال کررہی ہے۔

اس دوران اپنے خطاب میں راہل گاندھی نے آرایس ایس پر بھی جم کر نشانہ لگایا۔ کانگریس رہنما نے کہا کہ آرایس ایس دراوڑ نظریات کو پسند نہیں کرتا ہے اور تمل ناڈو پر اپنا کنٹرول قائم کرنا چاہتا ہے۔ راہل گاندھی کے مطابق تمل ناڈو کی شناخت، زبان اور ثقافت کی حفاظت کے لیے اس طرح کی ذہنیت کو سمجھنا ضروری ہے۔ انہوں نے کہا کہ بی جے پی براہ راست طور پر تمل ناڈو میں اپنی بنیاد قائم کرنے اور مضبوط  ہونے کی زمین تلاش کررہی ہے۔ اس لیے وہ اے آئی اے ڈی ایم کے کے ذریعہ ریاست کی سیاست میں داخل ہونے کی کوشش کررہی ہے۔