ووٹ چوری کے خلاف ملک میں غصہ، پھر بھی بیلگاوی میں 15 ہزار ووٹروں کے نام ہٹانے کی سازش: راہل گاندھی

نئی دہلی: کانگریس کے سینئر رہنما اور لوک سبھا میں اپوزیشن لیڈر راہل گاندھی نے کرناٹک کے بیلگاوی میں تقریباً 15 ہزار ووٹروں کے نام انتخابی فہرست سے ہٹانے کی کوشش پر بی جے پی اور الیکشن کمیشن کو نشانہ بنایا ہے۔ انہوں نے کہا کہ صرف تین دن، 22، 23 اور 24 ستمبر کو بڑی تعداد میں فارم 7 جمع کرائے گئے، جن کے ذریعے ووٹروں کے نام حذف کرانے کی کوشش کی گئی۔

راہل گاندھی نے ایک سوشل میڈیا پوسٹ میں دعویٰ کیا کہ اس کارروائی میں مسلم، درج فہرست ذاتوں (ایس سی)، درج فہرست قبائل (ایس ٹی) اور دیگر پسماندہ طبقات (او بی سی) سے تعلق رکھنے والے ووٹر خاص طور پر نشانے پر تھے۔ انہوں نے کہا کہ ان طبقات کے متعدد افراد بی جے پی کے خلاف ووٹ دیتے ہیں۔

انہوں نے کہا کہ وہ پہلے بھی ووٹر لسٹ سے نام حذف کرنے کے ایک طریقہ کار کی نشاندہی کر چکے ہیں، جس میں مرکزی سطح پر سافٹ ویئر کے ذریعے ووٹروں کے نام حذف کرنے کا الزام لگایا گیا تھا۔ راہل گاندھی نے دعویٰ کیا کہ منتخب ووٹروں کے خلاف بڑی تعداد میں فارم 7 خودکار طریقے سے بھرے جاتے ہیں اور اس پورے عمل کو اوپر کی سطح سے کنٹرول کیا جاتا ہے۔

بیلگاوی میں فارم 7 کے بڑے پیمانے پر استعمال کا معاملہ حالیہ دنوں میں سیاسی تنازعہ کا موضوع بنا ہوا ہے۔ 24 ستمبر کو مقامی سطح پر تقریباً 200 فارم 7 جمع کرانے کی کوشش کا معاملہ سامنے آیا تھا۔ ایک بوتھ لیول افسر نے ان فارموں پر دستخط کرنے سے انکار کر دیا تھا۔ بیلگاوی کے ڈپٹی کمشنر محمد روشن نے کہا تھا کہ اس واقعے سے متعلق موصول شکایات کی جانچ کی جائے گی اور خلاف ورزی ثابت ہونے پر قواعد کے مطابق کارروائی ہوگی۔

راہل گاندھی نے کہا کہ کرناٹک کانگریس کے رہنما اس معاملے میں ذمہ دار افراد کے خلاف ایف آئی آر درج کرانے کے لیے ریاست کے چیف الیکٹورل آفیسر کے دفتر پہنچے ہیں۔ انہوں نے سوال اٹھایا کہ چیف الیکٹورل آفیسر ایف آئی آر درج کرنے سے کیوں انکار کر رہے ہیں۔ اسی معاملے پر کرناٹک کے وزیر اعلیٰ ڈی کے شیوکمار نے بھی یکم اکتوبر کو چیف الیکٹورل آفیسر کے دفتر کے باہر دھرنا دیا اور تحقیقات و ایف آئی آر کا مطالبہ کیا۔

راہل گاندھی نے اپنے بیان میں وزیر اعظم نریندر مودی، وزیر داخلہ امت شاہ اور چیف الیکشن کمشنر گیانیش کمار پر بھی سنگین الزامات عائد کیے اور کہا کہ ایس آئی آر کے ذریعے جمہوریت کو ختم کیا جا رہا ہے۔ انہوں نے گیانیش کمار سے استعفیٰ دے کر سرکاری گواہ بننے اور مودی و شاہ کے خلاف تحقیقات کا مطالبہ کیا۔