پنجاب: لدھیانہ اور بھٹنڈا کے اسکولوں میں دھمکی آمیز ای میل سے خوف کا ماحول، ریلوے ٹریک اور اسٹیشنوں پر ہائی الرٹ

پنجاب پولیس میں جمعرات کے روز اس وقت کھلبلی مچ گئی جب انہیں ایک ساتھ اطلاع ملی کہ لدھیانہ کے 3 سے 4 اسکولوں میں بم رکھا گیا ہے اور اسکولوں کے ساتھ ساتھ ریلوے ٹریک کو بھی اُڑانے کا منصوبہ ہے۔ دھمکی دینے والے نے کہا کہ آنے والے 24 گھنٹوں میں یہ دھماکے کیے جائیں گے۔ یہ خبر ملتے ہی پولیس کی ٹیمیں فوراً اُن اسکولوں میں پہنچ گئیں جنہیں دھمکی ملی تھی۔

یہ ای میل اسکول انتظامیہ کی سرکاری ای میل پر موصول ہوئی تھی، جس کے بعد اسکول انتظامیہ نے فوراً چھٹی کا اعلان کر دیا۔ کمشنریٹ پولیس نے تمام متعلقہ اسکولوں میں پولیس ٹیمیں بھیج دیں تاکہ چیکنگ کی جا سکے۔ اس کے علاوہ جی آر پی کو بھی اطلاع دے دی گئی کہ وہ اپنے دائرہ اختیار میں آنے والے ریلوے ٹریک کی مکمل جانچ کرے تاکہ کوئی ناخوشگوار واقعہ پیش نہ آئے۔

موصولہ اطلاع کے مطابق جمعرات کی صبح سب سے پہلی ای میل شیرپور واقع اسپرنگ ڈیل پبلک اسکول کو موصول ہوئی، جس میں کہا گیا تھا کہ 23 سے 24 تاریخ کے درمیان اسکول کے اندر دھماکہ کیا جائے گا۔ اس کے علاوہ ای میل میں دیگر 3 اسکولوں کے نام بھی دیے گئے تھے اور ریلوے ٹریک کے بارے میں بھی معلومات دی گئی تھیں جہاں دھماکے کی دھمکی دی گئی تھی۔

اسکول انتظامیہ نے فوری طور پر اس ای میل کی خبر پولیس کے اعلیٰ حکام کو دی، جس کے بعد اسکول میں فوری طور پر چھٹی کر دی گئی اور بچوں کے والدین کو اطلاع دی گئی کہ وہ اپنے بچوں کو لے جائیں۔ اچانک چھٹی ہونے سے اسکول میں افرا تفری مچ گئی۔ اسی دوران پولیس ٹیم بھی وہاں پہنچ گئی، جس کے بعد لوگوں کو معلوم ہوا کہ اسکول میں بم رکھنے کی دھمکی دی گئی ہے۔ اسکول کے ہر گوشے کی تلاشی لی گئی، لیکن کچھ بھی مشتبہ نہیں ملا۔ اس کے علاوہ پولیس کی ٹیمیں دیگر 3 اسکولوں میں بھی چیکنگ کر رہی ہیں اور اسپرنگ ڈیل پبلک اسکول کے آس پاس کے علاقے کی بھی تلاشی جاری ہے۔ پولیس حکام کا کہنا ہے کہ دھمکی کے بعد مکمل چیکنگ کی گئی، لیکن کچھ نہیں ملا۔ اب یہ جانچ کی جا رہی ہے کہ ای میل کہاں سے آئی اور اسے کس نے بھیجا۔

دوسری طرف بھٹنڈا میں اس وقت خوف و ہراس پھیل گیا جب 2 معروف اسکول سینٹ زیویئر اور ملینیم اسکول کو بم سے اُڑانے کی دھمکی ملی۔ اس کے ساتھ ہی بھٹنڈا ریلوے اسٹیشن کو بھی نشانہ بنانے کی وارننگ بھری ای میل سامنے آئی ہے۔ تازہ اطلاعات کے مطابق سیکورٹی کے پیش نظر دونوں اسکولوں کو فوراً خالی کروا لیا گیا اور بچوں کو بحفاظت گھر بھیج دیا گیا۔ ریلوے اسٹیشن پر بھی پولیس ٹیمیں چوکس ہو کر تفتیش میں مصروف ہیں اور مسافروں و سامان کی سخت چیکنگ کی جا رہی ہے۔ دھمکی ملتے ہی پولیس اور سیکورٹی ایجنسیاں الرٹ ہو گئیں۔ اسکولوں کے احاطوں میں سرچ آپریشن چلایا گیا جبکہ اسٹیشن پر سیکورٹی مزید سخت کر دی گئی ہے۔