پنجاب: تباہ کن سیلاب زدہ علاقوں کا دورہ کریں گے راہل گاندھی، متاثرین سے کریں گے ملاقات

پنجاب اس وقت تباہ کن سیلاب کے اثرات سے دوچار ہے، جہاں تیز بارشوں اور دریاؤں میں طغیانی سے لاکھوں افراد کی زندگی متاثر ہوئی ہے۔ سرکاری اعداد و شمار کے مطابق ریاست کے 13 اضلاع کے 1400 سے زیادہ دیہات پانی میں ڈوب گئے ہیں، جس سے لاکھوں لوگ متاثر اور ہزاروں ہیکٹر زرعی زمین تباہ ہو چکی ہے۔ گھروں کے ڈہہ جانے، فصلوں کے برباد ہونے اور مویشیوں کے مرنے سے دیہی معیشت کو بھی شدید نقصان پہنچا ہے۔

ایسے حالات میں کانگریس کے رہنما اور رکن پارلیمان راہل گاندھی پیر کو پنجاب کے گورداسپور ضلع کا دورہ کریں گے۔ وہ یہاں سیلاب سے سب سے زیادہ متاثرہ دیہات کا جائزہ لیں گے اور مقامی عوام سے ملاقات کر کے ان کے مسائل براہِ راست سنیں گے۔ پارٹی ذرائع کے مطابق راہل گاندھی کا یہ دورہ صرف ہمدردی ظاہر کرنے تک محدود نہیں ہوگا بلکہ وہ متاثرین کے ساتھ کھڑے ہونے اور ان کے مسائل حکومت کے سامنے رکھنے کا عزم رکھتے ہیں۔

خیال رہے کہ پنجاب میں سیلاب کی شدت نے مرکز اور ریاستی حکومت دونوں کو فوری اقدامات پر مجبور کر دیا ہے۔ وزیر اعظم نریندر مودی نے حال ہی میں پنجاب کا دورہ کیا، جہاں انہوں نے فضائی سروے کے بعد صورتحال کا جائزہ لیا اور گورداسپور میں ایک اعلیٰ سطحی میٹنگ میں شرکت کی۔ اس موقع پر وزیر اعظم نے ریاست کے لیے 1600 کروڑ روپے کی اضافی مالی امداد کا اعلان کیا، جو پہلے سے منظور شدہ 12 ہزار کروڑ روپے کے علاوہ ہوگی۔ ساتھ ہی ایس ڈی آر ایف کی دوسری قسط پیشگی جاری کرنے اور کسانوں کو ’پی ایم کسان سمان ندھی‘ کے تحت مالی امداد فراہم کرنے کا اعلان بھی کیا گیا۔

وزیر اعلیٰ بھگونت مان نے بھی کابینہ کی میٹنگ کے بعد ایک ریلیف پیکیج پیش کیا۔ اس کے تحت سیلاب میں تباہ ہونے والے مکانات کے مالکان کو 40 ہزار روپے ملبہ ہٹانے کے لیے دیے جائیں گے، جبکہ جانوروں کے مرنے پر 37,500 روپے معاوضہ ملے گا۔ کسانوں کو فی ایکڑ 20 ہزار روپے کا معاوضہ دینے کا اعلان کیا گیا، جب کہ جان بحق ہونے والوں کے لواحقین کو 4 لاکھ روپے فراہم کیے جائیں گے۔ اس کے علاوہ کھیتوں میں جمع مٹی اور ریت کو 15 نومبر تک بیچنے کی اجازت بھی دی گئی ہے تاکہ کسان کسی حد تک نقصان کی تلافی کر سکیں۔

دوسری جانب عام آدمی پارٹی کے قومی کنوینر اور دہلی کے وزیر اعلیٰ اروند کیجریوال نے بھی 4 ستمبر کو متاثرہ علاقوں کا دورہ کیا تھا۔ انہوں نے اعلان کیا کہ عام آدمی پارٹی کے تمام اراکین پارلیمان اور اراکین اسمبلی ایک ماہ کی تنخواہ ریلیف فنڈ میں عطیہ کریں گے۔