پرشانت کشور ’بات بہار کی‘ کے ساتھ شروع کر سکتے ہیں اپنی سیاسی پاری

انتخابی حکمت عملی کے لئے ماہر مانے جانے والے پرشانت کشور نے اپنی خود کی سیاسی پاری شروع کرنے کا آج اشارہ دے دیا ہے۔ دہلی میں عام آدمی پارٹی کی حکمت عملی تیار کرنے والے پرشانت کشور نے آج پٹنہ میں اعلان کیا ہے کہ وہ نوجوانوں کا ایک سیاسی پلیٹ فارم تیار کریں گے اور اس کے لئے چلائی جانے والی کیمپین کا نام انہوں ’بات بہار کی‘ کا نام دیا ہے۔

نتیش کمار کی قیادت میں چلنے والی مخلوط حکومت کو آڑے ہاتھوں لیتے ہوئے پرشانت کشور نے کہا کہ بہار ملک کی دیگر ریاستوں کے مقابلہ میں کافی پچھڑا ہوا ہے اور بی جے پی کے ساتھ اتحاد کا ریاست کو کوئی فائدہ نہیں ہوا ہے۔ پرشانت کشور جو نتیش کمار کے انتہائی قریبی تصور کیے جاتے تھے اور اس قربت کی وجہ سے جنتا دل یو میں نائب صدر کے عہدے پر تھے، لیکن شہریت ترمیمی قانون اور این آر سی پر نتیش کمار سے ان کے اختلافات ہو گئے تھے، جس کے بعد اب وہ پارٹی کے رکن نہیں ہیں۔ انہوں نے اپنی پریس کانفرنس میں اشارہ دیا ہے کہ وہ سیکولر اتحاد بنائیں گے۔

پرشانت کشور نے اعلان کیا کہ وہ 20 فروری یعنی پرسوں سے ’بہار کی بات‘ تحریک شروع کریں گے اور ان کا ہدف ہے کہ سو دن کے اندر وہ ایک کروڑ نوجوانوں کو اپنی تحریک کا حصہ بنائیں۔ واضح رہے پرشانت کشور نے ’سیاست میں نوجوان‘ (یوتھ ان پالیٹکس) نام سے ایک فورم شروع کیا ہوا ہے اور اس فورم کی آفیشل ویب سائٹ کے مطابق اس فورم میں ابھی تک 2,38,054 ارکان ہیں۔ ویب سائٹ پر درج ہے کہ یہ نوجوانوں کا ملک گیر پلیٹ فارم ہے جس میں 18 سے 35 سال کی عمر کے نوجوان رکن ہیں۔

پرشانت کشور کی کمپنی آئی پی اے سی نے سال 2014 میں نریندر مودی، سال 2015 میں بہار اسمبلی کے لئے نتیش کمار کی جنتا دل یو، اتر پریش اور پنجاب میں کانگریس کے لئے، سال 2019 میں ترنمول کانگریس کے لئے مغربی بنگال اور آندھرا پردیش میں وائی ایس آر کانگریس کے لئے۔ حال ہی میں اختتام پذیر ہوئے دہلی اسمبلی انتخابات کے لئے عام آدمی پارٹی کی انتخابی حکمت عملی تیار کی تھی۔

اب یہ دیکھنا ہے کہ پرشانت کشور بہار اسمبلی انتخابات میں کس طرح حصہ لیں گے اور وہ اکیلے ہی چناؤ لڑیں گے یا پھر وہ دیگر سیاسی پارٹیوں سے اتحاد کریں گے اور اگر دیگر سیاسی پارٹیوں سے اتحاد کریں گے تو وہ کن کن پارٹیوں سے اتحاد کریں گے۔