چندر شیکھر آزاد کے یومِ شہادت پر وزیر اعظم نریندر مودی اور کانگریس قیادت کا خراجِ عقیدت

نئی دہلی: وزیر اعظم نریندر مودی نے جمعہ کے روز جدوجہدِ آزادی کے عظیم انقلابی چندر شیکھر آزاد کو ان کے یومِ شہادت پر خراجِ عقیدت پیش کیا اور کہا کہ قوم ان کی بے مثال قربانی کو ہمیشہ یاد رکھے گی۔

سوشل میڈیا پلیٹ فارم ایکس پر اپنے پیغام میں وزیر اعظم نے لکھا کہ مادرِ وطن کے بہادر سپوت چندر شیکھر آزاد کے یومِ شہادت پر وہ انہیں سلام پیش کرتے ہیں۔ انہوں نے کہا کہ آزاد نے وطن کو غلامی کی زنجیروں سے نجات دلانے کے لیے اپنی پوری زندگی وقف کر دی اور اسی مقصد کے لیے سب کچھ قربان کر دیا، اسی لیے وہ ہمیشہ یاد رکھے جائیں گے۔

دریں اثنا کانگریس صدر ملکارجن کھڑگے نے بھی ایکس پر اپنے پیغام میں آزاد کے قول کا حوالہ دیتے ہوئے لکھا، ’’میں ایسے مذہب کو مانتا ہوں جو برابری اور بھائی چارہ سکھاتا ہے۔‘‘ انہوں نے آزاد کو ہندوستان کا بہادر سپوت، عظیم محبِ وطن، انقلابی رہنما اور کروڑوں نوجوانوں کے لیے تحریک کا سرچشمہ قرار دیتے ہوئے انہیں عقیدت بھرا سلام پیش کیا۔

کانگریس نے اپنے سرکاری پیغام میں آزاد کے مشہور الفاظ دہرائے، ’’دشمن کی گولیوں کا ہم مقابلہ کریں گے، آزاد رہے ہیں اور آزاد ہی رہیں گے۔‘‘ پارٹی نے ان کی برسی پر انہیں خراجِ عقیدت پیش کرتے ہوئے کہا کہ ان کی قربانی اور نظریہ آج بھی ملک کے نوجوانوں کے لیے رہنمائی کا ذریعہ ہے۔

خیال رہے کہ چندر شیکھر آزاد تحریکِ آزادی کے نمایاں انقلابی رہنماؤں میں شمار کیے جاتے ہیں۔ 1906 میں پیدا ہونے والے آزاد نے کم عمری ہی میں برطانوی نوآبادیاتی حکمرانی کے خلاف جدوجہد کا آغاز کیا۔ وہ بعد میں ہندوستان سوشلسٹ ریپبلکن ایسوسی ایشن کے اہم رکن کے طور پر ابھرے اور شمالی ہندوستان میں انقلابی سرگرمیوں کی تنظیمِ نو میں کلیدی کردار ادا کیا۔

انہوں نے بھگت سنگھ سمیت دیگر انقلابیوں کے ساتھ مل کر برطانوی اقتدار کے خلاف سرگرمیاں تیز کیں۔ آزاد نے یہ عہد کیا تھا کہ وہ برطانوی حکام کے ہاتھ زندہ گرفتار نہیں ہوں گے۔ 27 فروری 1931 کو الہٰ آباد کے الفریڈ پارک میں پولیس مقابلے کے دوران انہوں نے اپنے اسی عہد کو نبھاتے ہوئے خود کو گولی مار لی اور تاریخ میں امر ہو گئے۔

ملک کے مختلف سیاسی رہنماؤں، مورخین اور شہریوں نے بھی اس موقع پر چندر شیکھر آزاد کی بہادری، اصولوں سے وابستگی اور حب الوطنی کو یاد کرتے ہوئے انہیں سلام پیش کیا۔