پی ایم مودی جموں وکشمیر میں حالات بگڑنے کی صورتحال واضح کریں: راہل گاندھی

نئی دہلی: کانگریس کے صدر راہل گاندھی نے گزشتہ رات کہا کہ جموں وکشمیر میں حالات بہت خراب ہونے کی رپورٹ آرہی ہے اور اس کے پیش نظر وزیراعظم نریندر مودی اور حکومت کو شفاف طریقہ سے ملک کوبتانا چاہیے کہ وہاں کی اصل صورتحال کیا ہے۔

راہل گاندھی نے نامہ نگاروں سے کہا کہ ایسی رپورٹیں آرہی ہیں کہ جموں وکشمیر میں حالات بہت خراب ہوگئے ہیں۔ وہاں تشدد ہونے کی بھی خبریں ہیں۔ میٹنگ میں نئے صدر کے بارے میں تبادلہ خیال روک کر جموں وکشمیر کے بارے میں بات چیت کی گئی اور اس پر ’پریزنٹیشن‘ دیا گیا۔

راہل گاندھی نے کہا کہ بہت ضروری ہے کہ وزیراعظم اور حکومت شفافیت سے ملک کے بتائیں کہ جموں و کشمیر میں اصل میں کیا ہو رہا ہے۔ وہاں حالات کنٹرول میں ہیں یا کیسے ہیں۔

کانگریس ورکنگ کمیٹی کی میٹنگ کانگریس ہیڈکوارٹر میں گزشتہ رات دوسری بار سوا آٹھ بجے کے قریب شروع ہوئی تھی جس میں راہل گاندھی نہیں آئے تھے۔ لیکن وہ تقریباََ سوا گھنٹے بعد میٹنگ میں پہنچے۔ راہل گاندھی نے نامہ نگاروں سے واضح کیا کہ وہ میٹنگ میں شامل نہیں ہو رہے تھے لیکن انہیں جموں و کشمیر کے سلسلہ میں رپورٹیں آنے کے پیش نظر اس میں بلایا گیا اور نئے صدر کے بارے میں تبادلہ خیال روک کر وہاں کی صورتحال پر بات چیت کی گئی۔