پلانی سوامی تمل ناڈو اسمبلی انتخابات میں این ڈی اے کے وزیر اعلیٰ کے امیدوار ہوں گے

مرکزی وزیر پیوش گوئل نے اعلان کیا کہ اے آئی اے ڈی ایم کے رہنما کے پالانی سوامی  یعنی ای پی ایس ہی  آئندہ تمل ناڈو اسمبلی انتخابات میں این ڈی اے کے وزیر اعلیٰ کے امیدوار ہوں گے۔ یہ اعلان ریاست میں انتخابی معرکہ آرائی کا اشارہ دیتا ہے۔ این ڈی اے نے واضح کر دیا ہے کہ وہ ڈی ایم کے حکومت کو چیلنج کرنے کے لیے پوری طرح تیار ہے۔

چنئی میں خطاب کرتے ہوئے پیوش گوئل نے کہا کہ این ڈی اے مرکز میں وزیر اعظم نریندر مودی اور تمل ناڈو میں پلانی سوامی کی قیادت میں ریاست میں حکومت بنائے گی۔ انہوں نے ڈی ایم کے حکومت پر لوگوں کی توقعات پر پورا اترنے میں ناکام رہنے کا الزام لگایا اور عوام اب ایک مضبوط متبادل چاہتے ہیں۔

پلانی سوامی کو وزیر اعلیٰ کے امیدوار کے طور پر اعلان کر کے این ڈی اے نے انتخابات سے قبل قیادت کے حوالے سے کسی بھی الجھن کو دور کر دیا ہے۔ گوئل نے کہا کہ اگر این ڈی اے اقتدار میں آتی ہے تو ریاست میں ایک مستحکم اور ترقی پر مبنی حکومت ہوگی۔ پیوش گوئل نے ڈی ایم کے حکومت پر نوجوانوں، کسانوں اور خواتین کے لیے کام کرنے میں ناکام ہونے کا الزام لگایا۔ انہوں نے کہا کہ موجودہ حکومت بدعنوان  اور کمزور ہو چکی ہے اور حکمرانی کا اخلاقی حق کھو چکی ہے۔

وزیر اعظم کے دورہ سے قبل چنئی میں این ڈی اے لیڈروں کی میٹنگ ہوئی۔ یہ میٹنگ پلانی سوامی کی رہائش گاہ پر ہوئی اور اس میں بی جے پی ایم ایل اے وناتھی سری نواسن بھی موجود تھے۔ اس سے یہ واضح ہو گیا کہ پلانی سوامی اتحاد میں کلیدی کردار ادا کر رہے ہیں۔وناتھی سری نواسن نے کہا کہ پلانی سوامی این ڈی اے کے وزیر اعلیٰ کے امیدوار ہیں اور پیوش گوئل ان سے ملاقات کر رہے ہیں۔ انہوں نے دعویٰ کیا کہ وزیراعظم مودی کی مدورائی ریلی تمل ناڈو کے انتخابات میں بڑی تبدیلی لائے گی۔