کیرالہ انتخابات میں شکست کے بعد پنرائی وجین کا پہلا ردعمل، بولے- ’یہ اختتام نہیں بلکہ نئی شروعات ہے‘

کیرالہ اسمبلی انتخاب میں بائیں بازو کے اتحاد ایل ڈی ایف کو ملی کراری شکست کے بعد سابق وزیر اعلیٰ اور سی پی ایم رہنما پنرائی وجین نے پہلی بار عوامی ردعمل دیا ہے۔ انہوں نے انتخابی نتائج کو عوام کا فیصلہ قرار دیتے ہوئے کہا کہ یہ شکست اختتام نہیں بلکہ ایک نئی شروعات ہے اور ایل ڈی ایف پہلے سے زیادہ مضبوطی کے ساتھ عوام کے درمیان واپس آئے گا۔

پنرائی وجین نے یونائیٹڈ ڈیموکریٹک فرنٹ یعنی یو ڈی ایف کو کامیابی پر مبارکباد دی اور کہا کہ عوام نے جو فیصلہ دیا ہے اسے عاجزی کے ساتھ قبول کیا جاتا ہے۔ انہوں نے کہا کہ سخت سیاسی مہمات، الزامات اور مخالفانہ پروپیگنڈے کے باوجود بڑی تعداد میں لوگوں نے ایل ڈی ایف کا ساتھ دیا، جو اتحاد کے لیے حوصلہ افزا بات ہے۔ ان کے مطابق مسلسل تیسری بار اقتدار میں واپسی کی امید پوری نہ ہونے کے باوجود عوامی حمایت کا ایک مضبوط حلقہ آج بھی ایل ڈی ایف کے ساتھ کھڑا ہے۔

انہوں نے کہا کہ گزشتہ دس برسوں میں حکومت نے ترقی، فلاحی منصوبوں، صحت، تعلیم اور سماجی تحفظ کے میدان میں بڑے کام کیے، جنہوں نے کیرالہ کے سماج میں نمایاں تبدیلیاں پیدا کیں۔

وجین نے دعویٰ کیا کہ ’نیا کیرالہ‘ بنانے کے لیے جو وژن تیار کیا گیا تھا، اس میں علم پر مبنی معیشت، نوجوانوں کو روزگار، خواتین کو بااختیار بنانے اور سماجی انصاف جیسے نکات شامل تھے، جنہیں اب مضبوط حزب اختلاف کے طور پر آگے بڑھایا جائے گا۔ پنرائی وجین نے کہا کہ ایل ڈی ایف عوامی مفاد کے ہر فیصلے کی حمایت کرے گا، لیکن اگر نئی حکومت عوام مخالف پالیسیاں اپناتی ہے تو اس کی سخت مخالفت بھی کی جائے گی۔ انہوں نے واضح کیا کہ اتحاد ایک ذمہ دار اپوزیشن کا کردار ادا کرنے کے لیے پوری طرح تیار ہے۔

انہوں نے انتخابی نتائج کے بعض پہلوؤں پر تشویش بھی ظاہر کی۔ وجین نے کہا کہ بی جے پی کا تین نشستیں جیتنا ایک سنجیدہ معاملہ ہے اور فرقہ وارانہ سیاست کے خلاف جدوجہد بغیر کسی سمجھوتے کے جاری رہے گی۔ ان کے مطابق سیکولرزم اور کثرتیت کا تحفظ ایل ڈی ایف کی بنیادی پالیسی ہے۔

سی پی ایم رہنما نے الزام لگایا کہ انتخابی مہم کے دوران بڑے پیمانے پر گمراہ کن پروپیگنڈہ کیا گیا اور بعض میڈیا اداروں نے بھی غیر ذمہ دارانہ کردار ادا کیا۔ انہوں نے کہا کہ آدھے سچ، بڑھا چڑھا کر پیش کی گئی باتیں اور جھوٹا پروپیگنڈہ جمہوریت کے لیے نقصان دہ ہیں۔ تاہم انہوں نے اس بات پر زور دیا کہ ایل ڈی ایف ان تجربات سے سبق لے کر اپنی خامیوں کا جائزہ لے گا اور عوام کے ساتھ اپنے رشتے کو مزید مضبوط بنائے گا۔

پنرائی وجین نے پارٹی کارکنان کا شکریہ ادا کرتے ہوئے کہا کہ ایل ڈی ایف عوام کا اعتماد دوبارہ حاصل کرے گا اور پہلے سے زیادہ طاقت کے ساتھ واپس آئے گا۔