فلیپائن کی ہندوستان سے مزید برہموس میزائل خریدنے کی تیاری، نظام میں تبدیلیوں کی بھی خواہش

فلیپائن ہندوستان سے برہموس سپرسانک کروز میزائلوں کی مزید خریداری کی تیاری کر رہا ہے۔ اس کے ساتھ ہی اس نے میزائل نظام میں کچھ تبدیلیاں کرنے کی خواہش بھی ظاہر کی ہے، تاکہ اسے ملک کی جغرافیائی صورتحال اور فوجی ضروریات کے مطابق مزید مؤثر بنایا جا سکے۔ فلیپائن کے وزیر دفاع گلبرٹو تھیوڈورو نے 4 نومبر کو منعقدہ تھرڈ دہلی ڈیفنس ڈائیلاگ میں اس منصوبے کا اشارہ دیا۔

'یوریشین ٹائمز' کی رپورٹ کے مطابق، تھیوڈورو نے کہا کہ ان کا ملک اپنے پاس موجود برہموس میزائل یونٹس کی تعداد بڑھانا چاہتا ہے۔ اس سلسلے میں ہندوستانی حکام کو اپنی خواہشات کی فہرست بھی دی گئی ہے، تاکہ میزائل نظام کو فلیپائن کے ماحول اور ضروریات کے مطابق بہتر بنایا جا سکے۔

رپورٹ میں بتایا گیا ہے کہ فلیپائن تقریباً پانچ مزید برہموس سسٹم یا مجموعی طور پر لگ بھگ 60 میزائل خرید سکتا ہے۔ اس ممکنہ معاہدے کی مالیت 70 کروڑ سے 80 کروڑ ڈالر کے درمیان ہو سکتی ہے۔ اس سے پہلے 2022 میں منیلا نے اپنی بحریہ کے لیے ساحل سے داغے جانے والے اینٹی شپ برہموس میزائلوں کی تین بیٹریاں خریدنے کے لیے ہندوستان کے ساتھ 37 کروڑ 50 لاکھ ڈالر کا معاہدہ کیا تھا۔

اس خریداری کا بنیادی مقصد چین کے مقابلے میں اپنی دفاعی صلاحیت کو مضبوط بنانا ہے، جو تقریباً پورے جنوبی بحیرۂ چین پر اپنا دعویٰ کرتا ہے۔ رپورٹ کے مطابق، فلیپائن اب برہموس کو محض ایک ہتھیار کے طور پر نہیں دیکھ رہا، بلکہ اسے اپنی وسیع تر ساحلی دفاعی حکمت عملی اور طویل فاصلے تک حملے کی صلاحیت کا اہم حصہ بنا رہا ہے۔

رپورٹ میں بتایا گیا ہے کہ رواں سال امریکی اور فلیپائنی میرین فورسز نے مشترکہ بحری حملے کی مشق بھی کی تھی۔ اس دوران برہموس اینٹی شپ میزائلوں کے استعمال کی مشق کی گئی اور ڈرونز کے ساتھ زمین سے داغے جانے والے میزائلوں کے ذریعے سمندری اہداف کو نشانہ بنانے کی حکمت عملی پر کام کیا گیا۔

فلیپائن حکومت نے مغربی لوزون کے ساحل پر واقع صوبہ زامبالیس کے علاقے میں فلپائن نیول اسٹیشن لیوویجلڈو گانتیوکی کو برہموس میزائلوں کے لیے خصوصی فوجی اڈے کے طور پر بھی تیار کیا ہے۔ رپورٹ کے مطابق، فوجی طاقت کے لحاظ سے فلیپائن کو چین کے مقابلے میں کمزور سمجھا جاتا ہے، لیکن برہموس میزائل اسے ایسی صلاحیت فراہم کرتے ہیں جس کے ذریعے وہ دشمن کی پیش قدمی محدود کرنے اور اس کی فوجی کارروائیوں کو مشکل بنا سکتا ہے۔

برہموس ایک تیز رفتار، انتہائی درست نشانہ لگانے والا سپرسانک کروز میزائل ہے، جسے زمین، سمندر اور فضا سے داغا جا سکتا ہے۔ اس کا مائع ایندھن پر مبنی ریم جیٹ انجن اسے تقریباً میک 3 کی رفتار فراہم کرتا ہے، جو آواز کی رفتار سے تقریباً تین گنا زیادہ ہے۔ اس کی ایک اہم خصوصیت زمین کے قریب پرواز کرنا، ریڈار کی گرفت میں کم آنا اور ہدف سے ٹکرانے کے وقت زیادہ حرکی توانائی پیدا کرنا ہے، جس کی وجہ سے اسے روکنا مشکل سمجھا جاتا ہے۔

فلیپائن کے سابق وزیر دفاع ڈیلفن لورینزانا بھی پہلے کہہ چکے ہیں کہ یہ میزائل مغربی فلپائن سمندر میں ملک کی خودمختاری اور حقوق کو چیلنج کرنے کی کسی بھی کوشش کے خلاف مضبوط دفاعی رکاوٹ ثابت ہوں گے۔ موجودہ وزیر دفاع تھیوڈورو بھی مختلف مواقع پر برہموس کو بحری سلامتی کے لیے فیصلہ کن تبدیلی لانے والا ہتھیار قرار دے چکے ہیں۔