فجر کی اذان کے لیے لاؤڈ اسپیکر کے استعمال کی اجازت، کرناٹک وقف بورڈ کے فیصلہ میں ترمیم

بنگلورو: کرناٹک وقف بورڈ نے اذانِ فجر کے لئے لاؤڈ اسپیکر کے استعمال کی اجازت دے دی ہے۔ وقف بورڈ نے ایک اطلاع جاری کرتے ہوئے کہا ہے کہ صبح کی اذان کے لئے لاؤڈ اسپیکر کے استعمال کی اجازت ہوگی لیکن طے شدہ معیارات پر عمل کرنا ضروری ہوگا۔ وقف بورڈ کے ذریعہ جاری کردہ اطلاع میں صرف اذانِ فجر کے لئے لاؤڈ اسپیکر کے استعمال کے قواعد کو تبدیل کیا گیا ہے، باقی تمام قواعد گزشتہ نوٹیفکیشن کی طرح ہیں۔

بورڈ نے واضح کیا ہے کہ اگر ضوابط پر عمل کیا جائے تو فجر کی اذان کے لئے لاؤڈ سپیکر استعمال کیا جا سکتا ہے۔ تاہم، ریاستی حکومت کے وزیر آنند سنگھ کا کہنا ہے کہ حکومت تفصیلی گفتگو کے بعد لاؤڈ اسپیکر پر پابندی لگانے پر غور کر رہی ہے۔

خیال رہے کہ ایک روز قبل کرناٹک اسٹیٹ وقف بورڈ نے صوتی آلودگی پر قابو پانے کے نام پر درگاہوں اور مساجد میں لاؤڈ اسپیکر کے تعلق سے ایک سرکلر جاری کیا تھا۔ اس سرکلر میں مساجد میں لاؤڈ اسپیکر کے استعمال پر صبح 10 بجے سے صبح 6 بجے تک پابندی عائد کر دی گئی تھی۔

جاری سرکلر میں کہا گیا ہے کہ دن میں بجنے والے اسپیکروں کی آواز طے پیمانوں کے مطابق ہوگی اور لاؤڈاسپیکر کا استعمال اذان یا کوئی خصوصی اطلاع دینے کے لیے ہی کیا جائے گا۔ مذہبی پروگراموں کے دوران مسجدوں کے احاطہ میں موجود لاؤڈاسپیکر کا استعمال کرنے کی ہدایت بھی دی گئی ہے۔ علاوہ ازیں مختلف مواقع پر تیز آواز کرنے والے پٹاخوں پر بھی روک لگا دی گئی ہے۔

سرکلر میں مزید کہا گیا، درگاہوں اور مسجدوں کے آس پاس خالی پڑے مقامات پر درخت لگائے جائیں اور صاف صفائی کی طرف خصوصی توجہ دی جائے۔ بورڈ نے کہا ہے کہ مذہبی مقامات پر لوگوں کو سوشل ڈسٹنسنگ پر بھی عمل کرنا ہوگا اور مذہبی مقامات پر یہ بھی خیال رکھنا ہوگا کہ بھکاری بڑی تعداد میں جمع نہ ہوں۔