مدھیہ پردیش میں کورونا وائرس متاثرین کی تعداد بڑھ کر 98 ہوئی، اب تک 6 کی موت

بھوپال: مدھیہ پردیش کے اندور میں کورونا وائرس کے 12 نئے کیس سامنے آنے کے بعد ریاست میں کورونا متاثرین کی تعداد بڑھ کر 98 ہو گئی، جس میں سے چھ افراد کی اب تک موت ہو چکی ہے۔

سرکاری ذرائع کے مطابق اندور میں 12 افراد میں کورونا وائرس کی تشخیص ہونے کے بعد وہاں متاثرین کی تعداد 63 سے بڑھ کر 75 پہنچ گئی، جو ریاست میں سب سے زیادہ ہے۔ اس کے علاوہ اجین میں 6، بھوپال میں 4، جبل پور میں 8، گوالیار میں 2، شیو پوری میں 2 اور كھرگون میں ایک مریض شامل ہے۔ اسے ملا کر ریاست میں کورونا وائرس متاثرین کی تعداد 86 سے بڑھ کر 98 ہو گئی ہے ۔

کورونا وائرس سے جاںبحق ہونے والوں میں بھی اندور سب سے آگے ہے، وہاں اب تک 3 کورونا وائرس سے متاثرہ مریضوں کی موت ہو چکی ہے۔ وہیں اجین میں دو اور ایک كھرگون میں كورونا سے متاثر مریض کی موت ہو گئی ہے۔ ریاست میں اب تک 98 کورونا وائرس متاثرین میں زیادہ تر مریضوں کی حالت مستحکم ہے، صرف اندور میں دو مریض ایسے ہیں، جن کی حالت نازک بتائی جا رہی ہے۔

ریاست میں مجموعی 989 کورونا وائرس مشتبہ افراد کے نمونے لئے گئے ہیں، جس میں سے 587 کی رپورٹ منفی آئی ہے۔ اس کے علاوہ چار ہزار سات سو پانچ مسافروں کی نگرانی کے لئے نشادہی کی گئی ہے اور 1296 مسافر قرنطینہ کی مدت مکمل کر چکے ہیں۔ وہیں 450 مسافروں کو اسپتال میں آئسولیشن میں رکھا گیا، جبکہ 3141 كو گھریلو قرنطینہ میں رکھا گیا ہے۔