گوا میں پیرا گلائیڈنگ حادثہ، خاتون سیاح اور ٹرینر کی کھائی میں گرنے سے موت

شمالی گوا میں پیرا گلائیڈنگ کے دوران ایک دردناک حادثہ پیش آیا ہے۔ اس حادثہ میں ایک خاتون سیاح اور ایک ٹرینر کی موت ہو گئی ہے۔ خبر رساں ایجنسی پی ٹی آئی نے پولیس کے حوالے سے اس حادثہ کی اطلاع دی۔ یہ واقعہ ہماچل پردیش کے کانگڑا اور کُلّو ضلعوں میں 24 گھنٹے کے اندر دو الگ الگ پیرا گلائیڈنگ حادثات میں دو سیاحوں کی موت کے ایک دن بعد ہوا ہے۔

پولیس نے اتوار کو بتایا کہ شمالی گوا میں پیرا گلائیڈنگ کرتے وقت 27 سالہ خاتون سیاح اور اس کے ٹرینر کی کھائی میں گرنے سے موت ہو گئی۔ حادثہ ہفتہ کی شام کیری گاؤں میں پیش آیا۔ انہوں نے بتایا کہ پونے کی رہنے والی شیوانی دابلے اور ان کی ٹرینر نیپالی شہری سومل نیپالی (26) کی شام تقریباً 5 بجے کیری پٹھار پر حادثہ میں موت ہو گئی۔

پولیس افسر کے مطابق جس ایڈونچر اسپورٹس کمپنی کے ساتھ پیرا گلائیڈنگ کرنے کا متبادل چنا تھا، وہ غیر قانونی طور سے چل رہی تھی۔ منڈریم پولیس اسٹیشن میں درج شکایت کے مطابق پیرا گلائیڈر چٹان سے اُڑان بھرنے کے فوراً بعد کھائی میں گر گیا، جس سے دونوں کی موقع پر ہی موت ہو گئی۔ کمپنی کے مالک شیکھر رائے زادہ کے خلاف بھارتیہ نیائے سنہتا (بی این ایس) کی مختلف دفعات کے تحت معاملہ درج کر لیا گیا ہے۔

قابل ذکر ہے کہ ہماچل پردیش کے کانگڑا اور کلو ضلع میں بھی 24 گھنٹے کے اندر دو الگ الگ پیرا گلائیڈنگ حادثات میں 2 سیاحوں کی موت ہو گئی تھی۔ پولیس نے ہفتہ کو بتایا کہ یہ سیاح گجرات اور تمل ناڈو کے تھے۔ دھرم شالہ میں احمد آباد کی ایک 19 سال کی لڑکی کی موت ہو گئی۔ حادثہ اندرو ناگ پیرا گلائیڈنگ ٹیک-آف پوائنٹ پر ہوا۔ حادثے میں پیرا گلائیڈنگ اسسٹنٹ گائیڈ کو معمولی چوٹیں آئی ہیں۔ وہیں ایک دیگر حادثہ میں جمعہ کی شام کو کلو ضلع میں گارسا لینڈنگ سائٹ کے پاس پیرا گلائیڈنگ کرتے وقت تمل ناڈو کے ایک 28 سالہ سیاح کی موت ہو گئی، جبکہ پائلٹ شدید طور پر زخمی ہو گیا۔