بہار حکومت پوری طرح ناکام ، 25 کو اسمبلی کا گھیراﺅ کریں گے : پپو

جن ادھیکاری پارٹی ( لوک تانترک) کے قومی صدر راجیش رنجن عرف پپو یادو نے بہار میں بڑھتے جرائم کو نتیش حکومت کی ناکامی کا نتیجہ بتایا اور کہاکہ ریاست میں جرائم اور مافیاﺅں کے رحم کرم پر سرکار چل رہی ہے۔

یادو نے کہاکہ ریاست میں نتیش حکومت کا ایک اقبال ختم ہوگیا ہے ایسا لگتاہے کہ حکومت نام کی کوئی چیز نہیں ہے ۔ انہوں نے الزام عائد کیاکہ نتیش نے اپنے ” نورتنوں “ کی مدد سے بہار میں کرپٹ سسٹم کی سلطنت قائم کر لی ہے ۔ جس کی وجہ سے عام لوگوں کا اعتماد حکومت سے ختم ہو چکا ہے ۔ بہار میں حزب اقتدار اور اختلاف نے سماجواد کے نام پر سماج میں زہر گھولا ہے جس سے پوری ریاست اور معاشرہ پراگندہ ہو گیا ہے ۔

سابق رکن پارلیمنٹ نے کہاکہ دارالحکومت پٹنہ میں ہوئے آبی جماﺅ، بڑھتے جرائم ، خواتین پر ظلم ، بڑھتی بے روزگاری ،طلباءپر ہورہے مظالم ، سماجی اور سیاسی آلودگی کے خلاف 25 نومبر 2019 کو بہار اسمبلی کا گھیراﺅ کیاجائے گا۔ گھیرا ﺅ کیلئے پٹنہ میں پرجوش تشہیری مہم ، پوسٹر ، بینر ، نکڑ سبھا کے ساتھ ۔ ساتھ عام لوگوں کے مابین عوامی بیداری مہم چلائی جائے گی آج پارٹی کی خصوصی میٹنگ میں یہ فیصلہ لیا گیا ہے ۔

اس موقع پر پارٹی کے قومی جنرل سکریٹری اعجاز احمد ، قومی سکریٹری راجیش رنجن پپو ، ریاستی صدر رگھوپتی سنگھ ، ریاستی پرجنرل سکریٹری سورج نارائن سہنی ، ریاستی جنرل سکریٹری شنکر پٹیل سمیت دیگر لیڈران موجود تھے۔