کراچی میں دہشت گردانہ حملہ کے لیے پاکستان نے ہندوستان کو ٹھہرایا ذمہ دار، تو کانگریس نے دکھایا آئینہ

پاکستان کے شہر کراچی میں ہونے والے دہشت گردانہ حملے کا الزام پاک آرمی چیف عاصم منیر نے ہندوستان پر لگا دیا ہے۔ پاکستان آرمی نے کہا کہ اس حملے کے پیچھے ہندوستان کا ہاتھ ہے۔ اس کے ساتھ ہی پراکسی تنظیم جماعت الاحرار نے اس حملے کو انجام دیا ہے۔ پاکستان کی طرف سے لگائے گئے ان الزامات کا کانگریس نے تگڑا جواب دیا ہے۔

کانگریس کے رہنما منیش تیواری نے’ ایکس‘ پر کہا کہ پاکستان کو یاد رکھنا چاہیے وہ امریکہ کی سابق وزیر خارجہ ہلیری کلنٹن نے 21 اکتوبر 2011 کو پاکستانی وزیر خارجہ حنا ربانی کھر سے کہا تھا: ’’آپ اپنے گھر کے آنگن میں سانپ پال کر یہ امید نہیں کرسکتے کہ وہ صرف آپ کے پڑوسیوں کو ہی کاٹیں گے۔ آخر کار وہ سانپ اسی کو ڈسیں گے جس نے انہیں اپنے گھر میں پالا ہے۔‘‘ منیش تیواری نے پاکستان کو نصیحت دیتے ہوئے کہا کہ اپنے اندر جھانک کر دیکھئے اور دنیا میں دہشت گردی اور دہشت گردوں کو بھیجنا بند کیجئے۔ انہوں نے کہا کہ ’’ڈیپ اسٹیٹ‘‘ کا مطلب ہے کہ اصل مسئلہ آپ لوگ ہی ہیں۔

پاکستان کے ڈی جی آئی ایس پی آر نے کراچی حملے کے حوالے سے ’ایکس‘ پر پوسٹ کرتے ہوئے کہا تھا کہ 27 جون 2026 کو کو کراچی میں پاکستان رینجرس (سندھ) کے کیمپ پر ہندوستان کی پراکسی تنظیم جماعت الاحرار سے وابستہ خوارج نے ایک بزدلانہ دہشت گردانہ حملہ کیا۔ کیمپ کے مرکزی دروازے پر دھماکے کے بعد حملہ آوروں نے سیکیورٹی حصار کو توڑنے کی کوشش کی لیکن رینجرس کے جوانوں کی مستعدی اور پرعزم کارروائی نے ان کے ناپاک عزائم کو مکمل طور پر ناکام بنا دیا۔ انہوں نے 3 دہشت گردوں کو مار گرایا اور ایک زخمی کو گرفتار کرلیا جوافغان شہری ہے۔

پاکستانی فوج نے اعتراف کیا کہ اس مڈبھیڑ میں ملک کے3 جوانوں نے عظیم قربانی دی، ڈیوٹی کے دوران جام شہادت نوش کیا جب کہ 4 فوجی زخمی ہوگئے۔ پاک آرمی کا کہنا تھا کہ ’’ہندوستان کی حمایت یافتہ کسی بھی تنظیم کو ختم کرنے کے لیے آپریشن چلائے جا رہے ہیں۔‘‘ اس کے ساتھ ہی پاکستان کی سیکیورٹی فورسز اور قانون نافذ کرنے والی ایجنسیوں کا ’عزم استحکام‘ وژن کے تحت اپنی انسداد دہشت گردی مہم پوری قوت کے ساتھ جاری رہے گی تاکہ ملک سے غیر ملکی حمایت یافتہ دہشت گردی کے خطے کو پوری طرح ختم کیا جاسکے۔

پاکستان اپنے فوجیوں کی شہادت کا بدلہ لینے کے لیے اس حملے کو انجام دینے والوں کے خلاف جوابی کارروائی کرے گا۔ ڈی جی آئی ایس پی آر نے بتایا کہ سی او اے ایس اور سی ڈی ایف عاصم منیر نے شہید فوجیوں کے اہل خانہ سے دلی تعزیت کا اظہار کیا ہے۔