الیکشن کمیشن کے خلاف اپوزیشن کا ہلاّ بول، راہل-پرینکا سمیت کئی بڑے رہنماؤں کا مارچ، پولیس نے روکا

بہار میں الیکشن کمیشن کے خلاف اٹھ رہی آواز اب دہلی تک پہنچ گئی ہے۔ پارلیمنٹ کے مانسون اجلاس میں اپوزیشن نے الیکشن کمیشن کے خلاف ہلاّ بولتے ہوئے راجدھانی کی سڑکوں پر مارچ نکالنا شروع کر دیا ہے۔ انڈیا اتحاد کا یہ مارچ پارلیمنٹ کے مکر دروازے سے الیکشن کمیشن کے دفتر تک نکالا جا رہا ہے جس کانگریس صدر ملکا ارجن کھڑگے، راہل گاندھی، پرینکا گاندھی، شرد پوار، اکھلیش یادو سمیت اپوزیشن کے 300 رہنما شامل ہیں۔

اپوزیشن رہنما راہل گاندھی کی قیادت میں اپوزیشن پارٹیوں کے اراکین پارلیمنٹ آج پارلیمنٹ ہاؤس کے مکر دروازے سے الیکشن کمیشن تک مارچ نکال رہے ہیں۔ یہ مارچ بہار میں ایس آئی آر اور راہل گاندھی کے ذریعہ لگائے گئے ’ووٹ چوری‘ کے الزامات کو لے کر نکالا جا رہا ہے۔ راستے میں اپوزیشن کے رہنماؤں کو روکنے کے لیے بیریکیڈنگ بھی کی گئی ہے۔ سماج وادی رہنما اکھلیش یادو بیریکیڈس پر چڑھتے ہوئے نظر آئے۔

اپوزیشن کے مارچ کو دہلی پولیس نے راستے میں ہی روک لیا ہے۔ اس کو لے کر اکھلیش یادو نے کہا، ’’وہ ہمیں روکنے کے لیے پولیس کا استعمال کر رہے ہیں۔‘‘ کانگریس ایم پی سید ناصر حسین نے کہا کہ ہمیں الیکشن کمشنر سے ملنے نہیں دیا جا رہا ہے۔ لوک سبھا اور راجیہ سبھا کے 300 سے زیادہ اراکین یہاں مارچ کر رہے ہیں۔ پولیس یہاں اراکین پارلیمنٹ کو گرفتار کر رہی ہے اور ہمیں الیکشن کمشنر سے ملنے نہیں دے رہی ہے۔

کانگریس رہنما ششی تھرور بھی راہل گاندھی کی قیادت میں نکالے گئے مارچ میں شامل ہوئے ہیں۔ ان کا کہنا ہے کہ جب تک لوگوں کے دل میں انتخابات کی شفافیت کو لے کر شبہ ہے، تب تک الیکشن کمیشن کی ساکھ کو نقصان پہنچ رہا ہے۔ اگر یہ شبہ دور ہو جائے تو الیکشبن کمیشن پر اعتماد پھر سے بحال ہو جائے گا۔ ان سوالوں کے حل کرنے کے لیے الیکشن کمیشن کا اپنا مفاد ہے۔