دہلی کے لا اینڈ آرڈر پر اپوزیشن لیڈر آتشی کا اظہار تشویش، وزیر داخلہ امت شاہ کو لکھا خط، ملاقات کا وقت مانگا

عام آدمی پارٹی کی لیڈر اور دہلی اسمبلی میں اپوزیشن لیڈر آتشی نے راجدھانی میں لا اینڈ آرڈر کی بگڑتی ہوئی صورتحال پر تشویش کا اظہار کیا ہے۔ انہوں نے مرکزی وزیر داخلہ امت شاہ کو ایک خط لکھ کر گزشتہ چند ماہ کے دوران دہلی میں ہونے والے مجرمانہ واقعات کا ذکر کیا ہے۔ ساتھ ہی سابق وزیر اعلیٰ دہلی آتشی نے لا اینڈ آرڈر کی بگڑتی ہوئی صورتحال پر تبادلہ خیال کرنے کے لیے وزیر داخلہ سے ملاقات کا وقت مانگا ہے۔

عآپ لیڈر نے خط میں لکھا کہ گزشتہ کچھ وقت سے، خاص طور پر حالیہ کچھ مہینوں میں دہلی میں پیش آنے والے مجرمانہ واقعات نے عام شہریوں کو خاص طور سے خواتین، بزرگوں اور تاجروں کے دلوں میں خوف اور عدم تحفظ کا ماحول پیدا کر دیا ہے۔ قتل، لوٹ پاٹ اور گولی باری کے مسلسل واقعات سے لوگوں میں ڈر و خوف کا ماحول پیدا ہو رہا ہے۔ انہوں نے مزید لکھا کہ دہلی کو سیکورٹی چاہیے، خاموشی نہیں۔

اپوزیشن لیڈر آتشی نے خط میں لکھا کہ ’’میں دہلی اسمبلی میں اپوزیشن لیڈر ہونے کے ناطے راجدھانی دہلی کے لا اینڈ آرڈر کی مسلسل بگڑتی ہوئی صورتحال کے متعلق گہری تشویش کے ساتھ یہ خط لکھ رہی ہوں۔‘‘ انہوں نے اپنے خط میں کچھ واقعات کا بھی ذکر کیا ہے، جن میں وزیر اعلیٰ ریکھا گپتا کے گھر کے پاس عآپ کارکن کا قتل، گریٹر کیلاش میں جِم کے باہر سرے عام قتل اور لال قلعہ کے پاس بم دھماکہ وغیرہ شامل ہے۔ انہوں نے کہا کہ یہ حملے عام شہریوں کے تحفظ کے نظام پر بڑا سوالیہ نشان ہے۔

آتشی نے لکھا کہ زیادہ تر معاملوں میں پولیس کی تاخیر، بے عملی اور جوابدہی کی کمی سے متعلق مسلسل لوگوں کی شکایتیں سامنے آ رہی ہیں۔ ساتھ ہی انہوں نے لکھا کہ دہلی پولیس کے براہ راست مرکزی وزارت کے تحت ہونے کے باوجود جرائم پر موثر کنٹرول قائم ہوتا ہوا نظر نہیں آ رہا ہے۔ عآپ لیڈر کا کہنا ہے کہ ملک کی راجدھانی ہونے کے ناطے دہلی کا لا اینڈ آرڈر صرف ایک ریاست کا معاملہ نہیں ہے، بلکہ یہ پورے ملک کے وقار، داخلی تحفظ اور جمہوری نظام سے منسلک معاملہ ہے۔ آج عام شہری یہ سوال پوچھنے کو مجبور ہے کہ جب ملک کی راجدھانی ہی محفوظ نہیں ہے تو عام لوگ اپنے تحفظ کے لیے کس پر بھروسہ کریں۔

سابق وزیر اعلیٰ نے اپنے خط میں لکھا کہ ’’اپوزیشن لیڈر کے طور پر میری آئینی ذمہ داری ہے کہ میں دہلی کے شہریوں کے خدشات اور توقعات کو آپ کے علم میں لاؤں۔ اسی سلسلے میں میں آپ سے گزارش کرتی ہوں کہ دہلی کے لا اینڈ آرڈر کی بگڑتی ہوئی صورتحال، پولیس انتظامیہ کی جوابدہی اور شہریوں کے تحفظ سے جڑے سنگین مسائل پر آپ سے ذاتی طور پر ملاقات کے لیے وقت دیں، تاکہ ان معاملات پر تفصیل سے تبادلہ خیال کیا جا سکے۔‘‘ ساتھ ہی انہوں نے لکھا کہ ’’مجھے یقین ہے کہ آپ اس سنگین معاملہ پر حساسیت کے ساتھ تبادلہ خیال کریں گے اور دہلی والوں کے تحفظ کو یقینی بنانے کے لیے ضروری ٹھوس قدم اٹھائیں گے اور ہمیں ملاقات کے لیے ضرور وقت دیں گے۔‘‘