حاملہ ہتھنی قتل معاملہ میں ایک ملزم گرفتار، 2 کی تلاش ہنوز جاری

کیرالہ کے پلکڈ میں حاملہ ہتھنی کی دردناک موت پر لوگوں کے افسوس اور ناراضگی کا سلسلہ ہنوز جاری ہے اور اس سلسلے میں اچھی خبر یہ ہے کہ ایک ملزم کی گرفتاری عمل میں آ گئی ہے۔ پولس ذرائع سے پتہ چلا ہے کہ جو شخص گرفتار کیا گیا ہے، وہ کھیتوں میں کام کرتا ہے۔ اس تعلق سے مزید دو لوگوں کی تلاش جاری ہے۔ یہاں قابل ذکر ہے کہ ایک دن قبل ہتھنی کی موت کی جانچ کر رہی کیرالہ کی محکمہ جنگلات کی ٹیم نے دو لوگوں کو حراست میں لے کر پوچھ تاچھ بھی کی تھی جس سے جانچ میں مدد ملنے کی بات کہی جا رہی ہے۔

واضح رہے کہ کیرالہ کے وزیر اعلیٰ پینارائی وجین نے گزشتہ دنوں ہتھنی کی موت سے متعلق جانچ کا حکم صادر کیا تھا اور اس کے بعد اپنے ایک بیان میں انھوں نے کہا تھا کہ جانچ ٹیم کی نظر تین مشتبہ لوگوں پر ہے۔ پینارائی وجین نے واقعہ کے قصوروار پائے جانے والے لوگوں کے خلاف سخت کارروائی کا دعویٰ بھی کیا ہے۔

اس درمیان حاملہ ہتھنی کی پوسٹ مارٹم رپورٹ بھی سامنے آئی گئی ہے جس میں کہا گیا ہے کہ دھماکہ کی وجہ سے ہتھنی کے منھ پر زخم بن گئے تھے۔ ہتھنی کئی دنوں سے بھوکی رہی اور 10 سے 12 دنوں سے کافی تکلیف میں تھی۔ اس درد کی وجہ سے وہ کچھ کھا پی بھی نہیں سکی اور کافی کمزور ہو گئی تھی۔ آخر میں وہ پانی میں گر گئی تھی اور ڈوبنے لگی تھی۔ رپورٹ کے مطابق پانی میں ڈوبنے کی وجہ سے ہتھنی کے جسم کے اندر کافی پانی چلا گیا تھا اور پھیپھڑوں نے کام کرنا بند کر دیا تھا۔