’نتیش کمار نے جنھیں وزیر اعلیٰ کی کرسی پر بٹھایا امت شاہ نے ان کی چپل اتروا دی‘، جیتن رام مانجھی پر جنتا دل یو کا حملہ

بہار کے سابق وزیر اعلیٰ جیتن رام مانجھی کے بیٹے سنتوش سمن نے گزشتہ دنوں نتیش کابینہ سے استعفیٰ دے دیا تھا۔ اس کے بعد نتیش کابینہ میں شامل کیے گئے رتنیش سدا نے جیتن رام مانجھی پر شدید حملہ کیا ہے۔ انھوں نے کہا کہ ایک طرف نتیش کمار نے جیتن رام مانجھی کو بہار کا وزیر اعلیٰ بنایا اور دوسری طرف بی جے پی ان کی چپل اتروا رہی ہے۔

دراصل رتنیش سدا کا یہ بیان جیتن رام مانجھی کی مرکزی وزیر داخلہ امت شاہ سے ملاقات کے ضمن میں سامنے آیا ہے۔ رتنیش سدا نے کہا کہ امت شاہ سے ملنے سابق وزیر اعلیٰ جیتن رام مانجھی جب گئے تو ان کے پیروں میں چپل نہیں تھی۔ جس شخص کو چپل پہن کر اندر نہیں آنے دیا گیا، اس شخص کا بی جے پی کا احترام کیسے کرے گی؟ رتنیش نے ساتھ ہی کہا کہ دلت مخالف نتیش کمار ہیں یا بی جے پی؟ نتیش کمار نے تو اپنی سیٹ چھوڑ کر جیتن رام مانجھی کو وزیر اعلیٰ بنا دیا۔ دوسری طرف امت شاہ سے ملنے جب مانجھی جی گئے تو چپل اتار کر گئے۔ مانجھی سماج کو انھوں نے بدنام کیا ہے۔

رتنیش سدا کا کہنا ہے کہ جیتن رام مانجھی ذاتی مفاد کے لیے کچھ بھی کر سکتے ہیں۔ چراغ پاسوان، مکیش سہنی وغیرہ بھی بی جے پی کے ساتھ جا رہے ہیں، لیکن دلت سماج کے ووٹر ان کے ساتھ کبھی نہیں جائیں گے۔