’ڈاٹا چوری‘ کی غلط خبر سے 39 ہندوستانیوں کی موت کا معاملہ دَبایا گیا: راہل

کانگریس صدر راہل گاندھی نے مرکزی حکومت پر عراق میں ہوئی 39 ہندوستانیوں کی موت کے ایشو سے ملک کو بھٹکانے کا الزام عائد کیا ہے۔ انھوں نے اس سلسلے میں ایک ٹوئٹ کرتے ہوئے مودی حکومت پر تنقید کی ہے۔ انھوں نے کہا ہے کہ ڈاٹا چوری کی خبر قصداً ایسے وقت میں پھیلائی گئی ہے جب 39 ہندوستانیوں کی موت پر مرکزی حکومت کٹہرے میں ہے۔ راہل کا کہنا ہے کہ اس خبر کو دبانے کے لیے ڈاٹا چوری کی خبر پلانٹ کی گئی ہے۔

راہل گاندھی نے اس سلسلے میں ٹوئٹ کرتے ہوئے کہا ہے کہ ’’39 ہندوستانیوں کی موت ہوئی، حکومت اس پر جھوٹ بولتے ہوئے پکڑی گئی۔ اس ایشو سے بچنے کے لیے راستہ نکالا گیا اور ڈاٹا چوری کی خبر کو عوام کے سامنے پیش کیا گیا۔‘‘ انھوں نے مزید لکھا کہ ’’نتیجہ یہ ہوا کہ ڈاٹا چوری کی خبر پر میڈیا سوال پوچھنے لگی اور 39 ہندوستانیوں کی موت کا معاملہ ختم ہو گیا۔ ساتھ ہی ان کی پریشانی بھی دور ہو گئی۔‘‘

قابل ذکر ہے کہ جب سے مرکزی حکومت نے عراق میں 39 ہندوستانیوں کی موت کی تصدیق کی ہے، اس وقت سے کانگریس مودی حکومت پر مہلوکین کے اہل خانہ کو گمراہ کرنے کا الزام لگا رہی ہے۔ کانگریس کا کہنا ہے کہ عراق میں 39 ہندوستانیوں کی کافی پہلے ہی موت ہو چکی تھی، لیکن مرکزی حکومت عراق میں مارے گئے ہندوستانیوں کے گھر والوں کو جھوٹی تسلی دے رہی تھی۔

کانگریس کا الزام اس معاملے میں سچ ثابت ہوا ہے۔ عراق حکومت کی فورنسک رپورٹ کے مطابق موصل شہر میں مارے گئے 39 ہندوستانیوں کی موت تقریباً 1 سال پہلے ہی ہو گئی تھی۔ ہندوستان ٹائمز کے مطابق عراق کے فورنسک محکمہ نے موصل میں مارے گئے ان ہندوستانیوں کی لاشوں کی فورنسک جانچ کی جس کے بعد یہ رپورٹ سامنے آئی ہے۔ فورنسک رپورٹ کے مطابق 39 ہندوستانیوں میں سے زیادہ تر لوگوں کے سر میں گولی مار کر قتل کیا گیا تھا۔ عراق کی وزارت صحت کے تحت کام کرنے والے فورنسک میڈیسن محکمہ نے ان ہندوستانیوں کی لاشوں کا ڈی این اے ٹیسٹ کرایا ہے۔ 39 ہندوستانیوں کی لاشوں کو مارٹرس فاؤنڈیشن نے موصل کے پاس بادوش میں ایک پہاڑی سے کھود کر نکالا تھا۔