نئے لیبر کوڈ مزدور دشمن، فوری واپس لیے جائیں، کانگریس لیڈر اُدت راج کا مطالبہ

کانگریس کی مزدور اور ملازم کانگریس (کے کے سی انڈیا) کے چیئرمین ڈاکٹر اُدت راج نے آل انڈیا کانگریس کمیٹی ہیڈکوارٹر، نئی دہلی میں منعقد پریس بریفنگ کے دوران مودی حکومت کے لائے گئے چار نئے لیبر کوڈز کو سراسر مزدور دشمن قرار دیتے ہوئے ان کی فوری واپسی کا مطالبہ کیا۔ انہوں نے واضح کیا کہ مزدور اور ملازم کانگریس ان کوڈز کے خلاف پورے ملک میں بڑے پیمانے پر احتجاج کرے گی۔

اُدت راج نے کہا کہ 22 نومبر کو بھی کانگریس نے شرم شکتی بھون کے باہر مظاہرہ کرتے ہوئے حکومت سے مطالبہ کیا تھا کہ تمام لیبر کوڈز کو ختم کیا جائے، کیونکہ یہ مزدوروں کے بنیادی حقوق، روزگار کی سلامتی اور بہبود کے نظام کو کمزور کرتے ہیں۔ ان کے مطابق چاروں قوانین مزدوروں کے لیے انتہائی نقصان دہ ثابت ہوں گے۔

انہوں نے کہا کہ پہلے ملک میں روزگار کے تحفظ اور صحت سے متعلق مضبوط قوانین موجود تھے لیکن نئے لیبر کوڈ نے انسپیکشن سسٹم کو تباہ کر دیا ہے۔ اس کمزور ڈھانچے کی وجہ سے نہ صرف مزدوروں کا استحصال بڑھے گا بلکہ مالکان کو کئی قانونی پابندیوں سے چھوٹ بھی مل جائے گی۔ اُدت راج کے مطابق نئے کوڈ میں گِگ ورکرز کو صرف رجسٹریشن تک محدود کر دیا گیا ہے، جبکہ ان کے لیے ’ایس ایس آئی سی‘ اور ’ای پی ایف او‘ جیسے سوشل سکیورٹی فائدے شامل ہی نہیں کیے گئے۔

انہوں نے ’ہائر اینڈ فائر‘ (تقرری کے بعد برطرفی) پالیسی کو سب سے زیادہ خطرناک بتاتے ہوئے کہا کہ اس سے غیر منظم شعبے کے مزدور شدید مشکلات کا شکار ہوں گے اور ان کی نوکری کی کوئی گارنٹی باقی نہیں رہے گی۔ مزید یہ کہ نئے قوانین میں مزدور کی ہڑتال جیسے آئینی حق کو بھی محدود کر دیا گیا ہے، جس کا نتیجہ جبری اور غیر منصفانہ کام کے ماحول کی شکل میں نکل سکتا ہے۔ انہوں نے کہا ’’یہ صورتحال عملی طور پر بندھوا مزدوری کو فروغ دے گی۔‘‘

ڈاکٹر اُدت راج نے الزام لگایا کہ یہ لیبر کوڈ صرف کارپوریٹ گھرانوں کو فائدہ پہنچانے کے لیے بنائے گئے ہیں اور ان میں مزدوروں کا کوئی تحفظ موجود نہیں۔ انہوں نے اعلان کیا کہ کانگریس اس پورے معاملے پر وسیع عوامی تحریک چلائے گی اور ملک کے ہر حصے میں احتجاج کیا جائے گا۔

کانگریس نے حکومت سے مطالبہ کیا کہ وہ مزدور مخالف نئے لیبر کوڈز کو فوراً واپس لے اور ایک ایسا نظام وضع کرے جو مزدوروں کے حقوق، روزگار کی سلامتی اور سماجی تحفظ کو یقینی بنائے۔