نواب ملک آرتھر روڑ جیل منتقل، 21 مارچ تک عدالتی تحویل میں رکھنے کا حکم

ممبئی کی ایک خصوصی پی ایم ایل اے عدالت نے مہاراشٹر کے کابینی وزیر اور این سی پی لیڈر نواب ملک کو منی لانڑرنگ کے ایک معاملے میں 21مارچ تک عدالتی تحویل میں رکھے جانے کا حکم جاری کیا جس کے بعد نواب ملک کو ممبئ کے آرتھر روڑ جیل منتقل کیا گیا-اس سے قبل انھیں عدالت نے کل سات مارچ تک محکمہ اانفورسمنٹ ڈائریکٹوریٹ(ای ڈی ) کی تحویل میں رکھے جانے کا حکم جاری کیا تھا-

نواب ملک کو 23 فروری کو گرفتار کیا تھا ان پر الزام ہے کہ انہوں نےسترہ برس قبل داؤد ابراہیم کاسکر کے چند قریبی ساتھیوں سے کرلا کی ایک جائیداد، گوالا کمپاؤنڈ کو خریدا تھا اور اس سودے کے درمیان مبینہ طور پر کالے دھن کا استعمال ہوا تھا-

کل صبح انہیں سخت حفاظتی بندوبست میں سیشن جج آر کے روکڑے کی عدالت میں پیش کیا گیا جہاں عدالت کی جانب سے عدالتی تحویل میں دئے جانے کے بعد انھیں آرتھر روڑ جیل منتقل کیا گیا۔ آرتھر روڑ میں ان کی آمد کے موقع پر راشٹروادی پارٹی کے سینکڑوں ورکرز باہر کھڑے تھے اور ان کی حمایت میں نعرہ لگا رہے تھے-