این آئی اے نے کسانوں کو طلب نہیں کیا: وزارت داخلہ

حکومت نےپارلیمنٹ میں وضاحت کرتے ہوئے بتایا کہ قومی تفتیشی ایجنسی (این آئی اے) نے تحریک چلارہے کسانوں میں سے کسی کو طلب نہیں کیا ہے۔وزیر مملکت برائے امور داخلہ کشن ریڈی نے بدھ کو راجیہ سبھا میں تحریری جواب میں یہ جانکاری دی۔

کانگریس کے جی سی چندرشیکھر ، پھولو دیوی نیتام اور دگ وجے سنگھ نے سوال کیا تھا کہ کیا اس مظاہرے میں شامل کسانوں کو قومی تفتیشی ایجنسی (این آئی) نے طلب کیا ہے۔اس کے جواب میں مسٹر ریڈی کی جانب سے دیئے گئے جواب میں صرف اتنا ہی لکھا گیا ہے کہ جی نہیں۔

واضح رہے کہ کچھ عرصہ قبل یہ رپورٹ آئی تھی کہ این آئی اے نے نئے زرعی قوانین کے خلاف مظاہرہ کررہے کچھ کسانوں کو پوچھ گچھ کے لئے طلب کیا ہے۔ مختلف سیاسی جماعتوں نے بھی اس کی شدید مخالفت کی تھی اور اس کے لئے حکومت کو تنقید کا نشانہ بنایا تھا۔

اگر این آئی اے نے کسی کو کسان کو طلب نہیں کیا تھاتو پھر یہ خبر کیسے عام ہوئی ۔ حکومت کو وضاحت کےعلاوہ یہ بھی پتہ لگانا چاہئے کہ ا س طرح کی رپورٹ کاذریعہ کیا تھا۔ اگر اس رپورٹ کا مقصد تحریک کے لئے ہمدردی حاصل کرنا تھا تو ایسی غلط رپورٹوں سے تحریک کو نقصان ہی ہوتا ہےکیونکہ جب بھی حقیقت سامنے آتی ہے تو پھر سوال پوچھے جاتےہیں۔