مودی-شاہ نے مہاراشٹر میں جمہوریت کو ختم کرنے کی کوشش کی، سونیا گاندھی

نئی دہلی: کانگریس صدر سونیا گاندھی نے جمعرات کو مہاراشٹر میں حالیہ سیاسی پیشرفت کے حوالہ سے وزیر اعظم نریندر مودی اور مرکزی وزیر داخلہ امت شاہ کو ہدف تنقید بنایا اور کہا کہ گورنر بی ایس کوشیاری کے ذریعہ ریاست میں جمہوریت کے خاتمے کی کوشش کی گئی۔

کانگریس پارلیمانی پارٹی کے اجلاس میں پارٹی رہنماؤں سے خطاب کرتے ہوئے دیویندر فڑنویس کو اچانک مہاراشٹر کا وزیر اعلی اور شرد پوار کے بھتیجے اجیت پوار کو نائب وزیر اعلی کی حیثیت سے حلف دلوانے کا ذکر کرتے ہوئے سونیا گاندھی نے کہا، ’’مہاراشٹر کے گورنر (کوشاری) نے انتہائی قابل مذمت کام کیا اور اس میں کوئی شبہ نہیں کہ انہوں نے وزیر اعظم اور وزیر داخلہ کے کہنے پر یہ کام انجام دیا۔‘‘

سونیا گاندھی نے کہا کہ بی جے پی نے قبل از انتخاب کی اپنی اتحادی جماعت شیوسینا کو تکبر میں آکر چھوڑ دیا۔ انہوں نے مزید کہا، ’’تین جماعتی مخلوط حکومت کی تشکیل کو ناکام بنانے کے لئے ہر ممکن کوشش کی گئی لیکن ہم نے سپریم کورٹ سے اپیل کی اور مودی-شاہ حکومت کو پوری طرح سے بے نقاب کردیا گیا۔‘‘

واضح رہے کہ مہاراشٹر میں فڑنویس کو حکومت بنانے کے لئے مدعو کرنے کے گورنر کے فیصلے کے خلاف شیوسینا، کانگریس اور نیشنلسٹ کانگریس پارٹی (این سی پی) نے ہفتے کے روز سپریم کورٹ میں اپیل کی تھی۔ سپریم کورٹ نے حالانکہ منگل کے روز یہ فیصلہ دیا کہ اگلے دن کے 5 بجے تک 288 رکنی ایوان میں فلور ٹیسٹ کرایا جائے۔ لیکن سپریم کورٹ کے فیصلے کے بعد اسی دن اجیت پوار اور فڑنویس نے اپنے عہدوں سے استعفیٰ دے دیا، جس سے تینوں فریقوں کے حکومت بنانے کا راستہ ہموار ہوا۔ سونیا نے کہا کہ تینوں جماعتیں بی جے پی کے غیر اخلاقی حربوں کو شکست دینے کے لئے پرعزم ہیں۔

معاشی کساد بازاری پر بی جے پی کی زیرقیادت مرکزی حکومت کو نشانہ بناتے ہوئے کانگریس صدر نے کہا، ’’مودی شاہ کو ملک میں درپیش اس سنگین چیلنج سے نمٹنے کا طریقہ نہیں معلوم۔ معیشت کی حالت دن بدن خراب ہوتی جارہی ہے۔ جی ڈی پی کم ہو رہی ہے، بے روزگاری بڑھ رہی ہے اور سرمایہ کاری ہونی بند ہو گئی ہے۔ انہوں نے کہا ، ’’مسائل سے نمٹنے کے بجائے مودی-شاہ حکومت اعداد و شمار سے کھیل رہی ہے اور وہ شائع نہ ہونے پائے اس کے لئے بھرپور کوشش کر ریہ ہے۔‘‘