لکھنؤ کوچنگ سینٹر آتشزدگی: جمعیۃ علماء ہند کا اظہارِ افسوس، اعلیٰ سطحی تحقیقات اور متاثرین کی مکمل امداد کا مطالبہ

نئی دہلی: جمعیۃ علماء ہند کے صدر مولانا محمود اسعد مدنی نے لکھنؤ کے علی گنج علاقے میں ایک کوچنگ سینٹر میں پیش آئے المناک آتشزدگی کے واقعے پر گہرے رنج و غم کا اظہار کرتے ہوئے متاثرہ خاندانوں سے دلی تعزیت اور یکجہتی کا اظہار کیا ہے۔ انہوں نے کہا کہ اس دل دہلا دینے والے سانحے نے پورے ملک کو غم زدہ کر دیا ہے اور انہیں یہ خبر سن کر شدید صدمہ پہنچا۔

مولانا محمود اسعد مدنی نے اپنے بیان میں کہا کہ جاں بحق ہونے والوں میں بڑی تعداد ایسے بچوں اور طلبہ کی تھی جو ٹیوشن کلاس میں شرکت کے لیے آئے تھے۔ انہوں نے کہا کہ معصوم بچوں کا اس طرح اچانک دنیا سے رخصت ہو جانا انتہائی افسوس ناک اور دردناک واقعہ ہے، جسے فراموش نہیں کیا جا سکتا۔ انہوں نے کہا کہ وہ متاثرہ خاندانوں کے دکھ میں برابر کے شریک ہیں اور دعاگو ہیں کہ مرحومین کی روح کو سکون پہنچے اور زخمیوں کو جلد صحت یابی نصیب ہو۔

انہوں نے مطالبہ کیا کہ واقعے کی غیر جانب دارانہ اور جامع تحقیقات کرائی جائیں اور اگر کسی بھی سطح پر غفلت یا کوتاہی سامنے آئے تو ذمہ دار افراد کے خلاف سخت قانونی کارروائی کی جائے۔ ساتھ ہی انہوں نے حکومت سے مطالبہ کیا کہ جاں بحق ہونے والوں کے اہل خانہ کو مناسب معاوضہ اور ہر ممکن سرکاری امداد فراہم کی جائے تاکہ ان کے غم و مصیبت میں کسی حد تک کمی لائی جا سکے۔

ادھر کنگ جارج میڈیکل یونیورسٹی کے ٹراما سینٹر کے طبی نگران ڈاکٹر امیا اگروال نے خبر رساں ایجنسی پی ٹی آئی کو بتایا کہ 21-22 بچوں کو اسپتال لایا گیا تھا، جن میں سے 15 بچے مردہ حالت میں تھے، جبکہ 5 زخمی بچوں کو علاج کے لیے داخل کیا گیا ہے۔ دو بچوں کو عمارت سے چھلانگ لگانے کے باعث کمر میں چوٹیں آئی ہیں اور ان کا علاج جاری ہے۔ انہوں نے بتایا کہ متوفیوں کی قانونی کارروائی مکمل کرنے کے بعد لاشوں کو مردہ خانے منتقل کیا جا رہا ہے۔

اتر پردیش کے نائب وزیر اعلیٰ برجیش پاٹھک نے واقعے کی اعلیٰ سطحی تحقیقات کا اعلان کیا ہے، جبکہ وزیر اعلیٰ یوگی آدتیہ ناتھ نے جائے حادثہ کا دورہ کرکے امدادی کارروائیوں کا جائزہ لیا اور جاں بحق ہونے والوں کے اہل خانہ سے تعزیت کا اظہار کیا۔ آگ بجھانے والے عملے نے تلاش اور بچاؤ کی کارروائی مکمل کر لی ہے۔

اس سانحے پر قائد حزب اختلاف راہل گاندھی اور سماجوادی پارٹی کے صدر اکھلیش یادو سمیت متعدد سیاسی رہنماؤں نے بھی گہرے دکھ کا اظہار کرتے ہوئے متاثرہ خاندانوں سے ہمدردی کا اظہار کیا ہے اور زخمیوں کو بہترین طبی سہولیات فراہم کرنے کا مطالبہ کیا ہے۔