ممتا بنرجی کی بنگلہ دیش انتخابات میں بی این پی کی کامیابی پر طارق رحمٰن کو مبارکباد

کولکاتا: مغربی بنگال کی وزیر اعلیٰ ممتا بنرجی نے بنگلہ دیش میں منعقدہ عام انتخابات میں بنگلہ دیش نیشنلسٹ پارٹی (بی این پی) کی کامیابی پر پارٹی کے سربراہ طارق رحمن کو مبارکباد پیش کی ہے۔ پڑوسی ملک میں جمعرات کو ہونے والی ووٹنگ کے بعد جمعہ کو نتائج واضح ہو گئے، جن میں بی این پی کو نمایاں کامیابی حاصل ہوئی۔

وزیر اعلیٰ ممتا بنرجی نے سوشل میڈیا پلیٹ فارم ایکس پر اپنے پیغام میں نہ صرف طارق رحمن اور ان کی جماعت کو مبارکباد دی بلکہ بنگلہ دیش کے عوام کو بھی پُرامن طریقے سے انتخابی عمل میں حصہ لینے پر نیک خواہشات پیش کیں۔ انہوں نے اپنے پیغام میں لکھا کہ بنگلہ دیش کے تمام بھائیوں اور بہنوں کو ان کی جانب سے دلی مبارکباد اور ’شُبھونندن‘۔ انہوں نے رمضان المبارک کی پیشگی مبارکباد دیتے ہوئے کہا کہ وہ دعا گو ہیں کہ بنگلہ دیش کے عوام خوشحال اور صحت مند رہیں اور دونوں ممالک کے تعلقات ہمیشہ خوشگوار رہیں۔

ممتا بنرجی نے اپنے پیغام میں طارق رحمن کو ’میرے طارق بھائی‘ کہہ کر مخاطب کیا اور کہا کہ یہ بڑی کامیابی عوام کے اعتماد کا اظہار ہے۔ انہوں نے اس امید کا بھی اظہار کیا کہ بنگلہ دیش اور ہندوستان کے درمیان باہمی روابط مزید مستحکم ہوں گے اور دونوں ممالک خطے میں امن اور ترقی کے لیے مل کر کام کریں گے۔

اس سے قبل وزیر اعظم نریندر مودی نے بھی طارق رحمن اور بی این پی قیادت کو انتخابی کامیابی پر مبارکباد دی تھی۔ انہوں نے ایکس پر اپنے پیغام میں کہا کہ بنگلہ دیش کے پارلیمانی انتخابات میں بی این پی کی بڑی جیت پر وہ طارق رحمن کو دل کی گہرائیوں سے مبارکباد دیتے ہیں۔

وزیر اعظم نے کہا کہ یہ کامیابی بنگلہ دیش کے عوام کے اعتماد کی عکاسی کرتی ہے اور ہندوستان ایک جمہوری، ترقی پسند اور سب کو ساتھ لے کر چلنے والے بنگلہ دیش کے ساتھ کھڑا رہے گا۔ نریندر مودی نے مزید لکھا کہ وہ دونوں ممالک کے مختلف شعبوں میں تعلقات کو مزید مضبوط بنانے اور مشترکہ ترقیاتی اہداف کو آگے بڑھانے کے لیے مل کر کام کرنے کے منتظر ہیں۔

اسی سلسلے میں کانگریس صدر ملکارجن کھڑگے نے بھی بنگلہ دیش کے پارلیمانی انتخابات میں کامیابی پر طارق رحمن اور بی این پی کو مبارکباد دی۔ انہوں نے ایکس پر اپنے پیغام میں کہا کہ انڈین نیشنل کانگریس کی جانب سے وہ طارق رحمن اور بی این پی کو اس کامیابی پر مبارکباد پیش کرتے ہیں۔ ان کا کہنا تھا کہ ہندوستان اور بنگلہ دیش کے درمیان تاریخ، زبان، ثقافت اور متعدد مشترکہ اقدار پر مبنی گہرے تعلقات موجود ہیں۔ انہوں نے اس بات پر زور دیا کہ ایک جمہوری، ترقی پسند اور جامع بنگلہ دیش کو خطے کے استحکام اور امن کے لیے تمام ہندوستانیوں کی حمایت حاصل رہے گی۔