مہاراشٹر میں سیلابی صورتحال: بیڈ، دھاراشیو اور سولاپور میں این ڈی آر ایف نے 94 افراد کو بچایا

بیڈ: مہاراشٹر کے کئی اضلاع میں مسلسل ہونے والی بارش نے عوامی زندگی کو بری طرح متاثر کیا ہے۔ بیڈ، دھاراشیو اور سولاپور اضلاع میں پانی بھرنے سے سیلابی حالات پیدا ہو گئے ہیں۔ اس صورتحال کو دیکھتے ہوئے انتظامیہ کی درخواست پر این ڈی آر ایف کی ٹیمیں فوری طور پر موقع پر پہنچیں اور رات بھر جاری رہنے والے آپریشن میں درجنوں افراد کو محفوظ مقامات پر منتقل کیا گیا۔

بیڈ ضلع کے مجل گاؤں تحصیل کے سنداس چنچولے علاقے میں پانی گھروں میں داخل ہو گیا، جس کی وجہ سے مقامی باشندے پھنس گئے۔ این ڈی آر ایف کی ٹیم نے رات بھر مسلسل کارروائی کرتے ہوئے 26 افراد کو بحفاظت نکالا۔ سب سے اہم لمحہ اس وقت آیا جب منگل کی صبح ایک نوزائیدہ بچہ اور ایک خاتون بھی کامیابی سے ریسکیو کیے گئے۔ اس کے بعد دیہی عوام نے راحت کی سانس لی اور اہلکاروں کے حوصلے کی تعریف کی۔

اسی طرح دھاراشیو ضلع کے کپلاپوری گاؤں میں بھی شدید بارش سے حالات بگڑ گئے۔ پانی گھروں تک پہنچ گیا اور گاؤں والے اندر ہی محصور ہوگئے۔ این ڈی آر ایف کی ٹیم نے مشکل حالات کے باوجود رات بھر آپریشن جاری رکھا اور 9 شہریوں کو محفوظ مقام تک پہنچانے میں کامیابی حاصل کی۔

سولاپور ضلع میں بھی کچھ ایسے ہی حالات رہے۔ این ڈی آر ایف کی ٹیم نے یہاں مختلف علاقوں میں ریسکیو آپریشن چلایا اور 59 افراد کو نکالا، جن میں خواتین، بچے اور بزرگ شامل تھے۔

مقامی انتظامیہ اور عوام نے این ڈی آر ایف کے بروقت ایکشن اور بہادری کو سراہا۔ ان کا کہنا تھا کہ وقت پر مدد نہ پہنچتی تو بڑی تباہی کا اندیشہ تھا۔ انتظامیہ نے بھی اہلکاروں کی پیشہ ورانہ مہارت اور نڈر خدمت کو خراج تحسین پیش کیا۔

اس سے پہلے، ہندوستانی فوج بھی بیڈ ضلع کے گھاٹ پنپری اور آس پاس کے گاؤں میں مدد کے لیے آگے آئی تھی، جہاں پانی کی سطح بلند ہونے سے راستے بند ہو گئے تھے۔ ضلع کلکٹر کی درخواست پر فوج نے مقامی شہریوں کو نکالنے اور امدادی سرگرمیوں میں حصہ لیا۔

مزید برآں، گزشتہ دنوں ناسک سے ایک ایڈوانسڈ لائٹ ہیلی کاپٹر اور دو چیتک ہیلی کاپٹر بھی متاثرہ علاقوں میں بھیجے گئے تھے تاکہ موسم سازگار ہونے پر ہوائی راستے سے لوگوں کو محفوظ نکالا جا سکے۔ مہاراشٹر میں حالیہ بارش نے دیہی علاقوں میں خاصا نقصان پہنچایا ہے، تاہم این ڈی آر ایف اور فوج کے بروقت اقدامات نے بڑی تعداد میں شہریوں کو محفوظ رکھنے میں اہم کردار ادا کیا۔